11 марта 2017 г.
Пĕтĕм Раççейри «Симĕс патруль» общество организацийĕ çĕршыври субъектсенче 2016-2017 çулсенчи хĕллехи тапхăрти экологи рейтингне ирттернĕ. Унта Чăваш Республики 4-мĕш вырăн йышăннă.
Рейтинга йĕркеленĕ чухне сывлăшпа шыв тасалăхне, çÿп-çапа вăхăтра турттарса кайнине, ку енĕпе влаçсен яваплăхĕ мĕнле пулнине тĕп вырăна хунă. Çĕнĕ Шупашкарти каяшсене сортлакан комплекс тата полигон, Шупашкарта çÿп-çапа тиесе ăсатакан станци туни, çакăн пек станцисем кăçал Канашпа Çĕмĕрле районĕнче те тума палăртни экологие лайăхлатма нумай пулăшĕ.
Чăваш Енре çутçанталăка упрас тата унăн пуянлăхне ÿстерсе пырас тĕлĕшпе те нумай ĕç туса ирттереççĕ. Экологи çулталăкĕнче пурнăçламалли ĕçсене республика Пуçлăхĕ тÿрремĕнех тĕрĕслесе тăрать.