07 марта 2017 г.
Ĕнер район администрацийĕн пуçлăхĕ Николай Миллин райадминистрацин структура подразделенийĕсен, ял тăрăхĕсен, предприятисемпе организацисен ертÿçисемпе канашлу ирттернĕ.
Канашлу пуçламăшĕнче район администрацийĕн пуçлăхĕ «Прогресс» акционерсен хупă обществин механизаторне Юрий Жирнова Чăваш Республикин Ялхуçалăх министерствин Хисеп грамотине парса чыс турĕ. Юрий Петрович акционерсен обществинче нумай çул тÿрĕ кăмăлпа ака-суха тăвать, тыр-пул пуçтарса кĕртет. Хуçалăх çакăн пек пултаруллă механизаторсем çинче тытăнса тăрать, çитĕнÿсем тăвать.
Кăçалхи январĕн 30-мĕшĕнче Чăваш Республикин Пуçлăхĕ Михаил Игнатьев «Чăваш Республикин территорийĕнче вырăнти пуçарусем çинче никĕсленнĕ общество инфратытăмне аталантармалли проектсене пурнăçа кĕртесси çинчен» 7-мĕш номерлĕ Указ йышăннă. Унпа пухăннисене район администрацийĕн пуçлăхĕн çумĕ - финанс пайĕн начальникĕ Галина Анисимова паллаштарчĕ. Указ вырăнти ыйтусене татса панă чухне тĕрлĕ шайри бюджет тата халăх укçи-тенкине пĕрлештерме, вырăнти хăйтытăмлăх органĕсене тата халăха пĕр-пĕринпе çыхăнса ĕçлеме, вырăнти пуçарусене анлă çул пама пулăшать. Сăмахран, ял тăрăхĕнче республика тата вырăнти бюджетран уйăрнă тата халăхран пуçтарнă укçа-тенкĕпе /унăн 60 процентне республика бюджечĕ уйăрать, 40 проценчĕ вырăнти хăйтытăмлăх органĕн, çав шутран 10 процентран кая мар халăх укçи-тенки/ вырăнти пĕр-пĕр инфратытăма аталантарасшăн. Çакăн валли вырăнти хăйтытăмлăх органĕ проект хатĕрлет, республикăри конкурса тăратать. Чи лайăххисене суйласа илеççĕ, укçа-тенкĕ уйăраççĕ.
Нумаях пулмасть ял тăрăхĕсенче граждансен пухăвĕсем вĕçленчĕç. Ял тăрăхĕсен пуçлăхĕсем вĕсенче хускатнă ыйтусем çинче чарăнса тăчĕç, ял çыннисем инфратытăма аталантарас тĕлĕшпе панă сĕнÿсем тăрăх хатĕрлекен проектсемпе паллаштарчĕç. Граждансен пухăвĕсенче урамсене çул-йĕр сарса хытарас, шывпа тивĕçтерес, территорисене, масарсене тирпей-илем кĕртес, йăлара пухăнакан ăпăр-тапăра пуçтарас тата ытти ыйтусене хускатнă.
Район администрацийĕн пуçлăхĕ Николай Миллин ял çыннисен пуçарăвĕпе инфратытăма аталантармалли проектсене хатĕрлессине хăвăртлатма, йăлари ăпăр-тапăра уйрăммăн пуçтарассине çывăх вăхăтрах йĕркелесе яма хушса хăварчĕ.