07 марта 2017 г.
Аннесем салам сăмахĕсене йышăнаççĕ
Елчĕкри пĕтĕмĕшле пĕлÿ паракан вăтам шкулта кĕçĕн классенче вĕренекенсем хăйсен вĕрентекенĕсем ертсе пынипе мартăн 8-мĕшĕ умĕн районти предприятисемпе организацисенче пулса вĕсенче ĕçлекен хĕрарăмсене уяв ячĕпе саламланă.
В.Молоствова вĕрентекен хăйĕн туслă 3 «а» класĕпе «Елчĕк ен» хаçат редакцийĕнче вăй хуракан хĕрарăмсене саламлама килсе çитрĕ. Арçын ачасемпе хĕрачасем çут тĕнчери чи хаклă çынна - аннене халалланă сăвăсем каларĕç, тĕрлĕрен юрăсем шăрантарчĕç, хăйсем ăсталанă парнесем пачĕç. Хисеплесе куç тĕлне туни, чуна тивмелле сăмахсем кăмăла ăшăтаççĕ, тăрăшса ĕçлеме хавхалантараççĕ.
С.АНАТОЛЬЕВА.
Спартакиадăна хутшăннă
Иртнĕ шăматкун, пуш уйăхĕн 4-мĕшĕнче, Чăваш Республикинчи патшалăх влаçĕн тата вырăнти хăйтытăмлăх органĕсенче ĕçлекенсен спартакиади иртнĕ.
Вĕсем кашни çулхи пекех йĕлтĕрпе чупас енĕпе ăмăртнă. Пирĕн район чысне хÿтĕленĕ команда /унта 5 çын пулнă/ улттăмĕш вырăна тухнă. Спартакиадăна хутшăннă республикăри 30 команда хушшинче Елчĕксем пĕрремĕш теçеткене кĕни - пысăк çитĕнÿ.
М.Васильев ÿнерçĕн ĕçĕсемпе паллашнă
Елчĕк районне йĕркеленĕренпе 90 çул çитнине халалласа Çирĕклĕ Шăхалĕнчи культура çуртĕнче Михаил Васильев ÿнерçĕн «Юрататăп сана, манăн тăван енĕм» куравне йĕркеленĕ.
Тĕмер ялĕнче çуралса ÿснĕ, 1990-мĕш çулсен варринче ÿнер ĕçне пикеннĕ Михаил Васильев хăйĕн ÿкерчĕкĕсене тĕрлĕ жанрпа калăплама ăста. Портретсемпе натюрмортсем, йăлари ытти ÿкерчĕксем хальхи вăхăтра унăн пухмачĕнче 180 ытла шутланаççĕ. Вĕсенчен нумайăшĕпе куравра паллашма пулать.
Çирĕклĕ Шăхалĕнчи пĕтĕмĕшле пĕлÿ паракан вăтам шкулти улттăмĕш класс ачисем Галина Чернова вĕрентекен ертсе пынипе куравра пулса курнă. Художник тăван тăрăхри ытарайми вырăнсене нумай калăпланă. Вĕренекенсемшĕн те çак вырăнсем çав териех çывăх пулнăран вĕсем кашни ĕçпе тата кăсăкланса паллашнă.
Кĕçĕннисем - виççĕмĕш
«Ылтăн шайба» клуб парнисемшĕн пынă тупăшура пирĕн районти кĕçĕн ушкăнри çамрăк хоккеистсем республикăра виççĕмĕш вырăн йышăннă.
Пурте пĕлетпĕр, пирĕн районти вăтам ушкăнри çамрăк хоккеистсем Пĕтĕм Раççейри финала хутшăнаççĕ. Аслăрах юлташĕсенчен кĕçĕн ушкăнри хоккеистсем те кая юласшăн пулмарĕç - республикăри финала тухрĕç. Шел, вĕсем малтанхи вăйăра Çĕнĕ Шупашкарсене 1:4 шутпа выляса ячĕç. Виççĕмĕш вырăншăн пынă вăйăра Етĕрнесенчен 3:0 шутпа выляса илсе бронза медальсене тивĕçрĕç. Çавăн пекех командăна клюшкăсем туянма 20 пин тенкĕлĕх сертификат панă. Командăна Ю.Петровпа Г.Адюков тренерсем хатĕрленĕ.