04 марта 2017 г.
Елчĕксем кăçал та хастар
Республикăра «Ачалăх ячĕпе, ачалăхшăн» ыркăмăллăх марафонĕ пуçланни çинчен пĕлтернĕччĕ.
Елчĕксем унта пĕрремĕш утăмсем тума ĕлкĕрнĕ те. Пуçаруллисем кăçал та «Интермедсервис» ОООпа Курнавăшри пĕтĕмĕшле пĕлÿ паракан вăтам шкул коллективĕсем пулчĕç. Вĕсем пухмач кассине 5300 тенкĕ хывнă.
Алексей Шадрикова - хисеплĕ ят
Таяпа Энтринче çуралса ÿснĕ, мĕн пĕчĕкрен музыкăпа кăсăкланнă Алексей Шадриков юрăç ентешсемшĕн кăна мар, республика, ун тулашĕнчи çынсемшĕн паллă ят.
Чăваш Республикин Пуçлăхĕн 2017 çулхи пуш уйăхĕн 1-мĕшĕнче кăларнă 21-мĕш указĕпе килĕшÿллĕн регионсем хушшинчи «Чăваш наци конгресĕ» общество организацийĕ çумĕнчи Чăваш Республикинчи çамрăксен «Хастар» общество организацийĕн председателĕн çумне Алексей Валерьевич Шадрикова «Чăваш Республикин культурăн тава тивĕçлĕ ĕçченĕ» хисеплĕ ят парса чысланă.
Шыв-шур тимлĕх ыйтать
Çанталăк тăруках ăшăтса янăран часах çырма-çатра шывпа тулĕ.
Çавна май çурхи шыв-шур кашнине асăрхануллă пулма ыйтать. Районта 29 гидросооружени. Ялсенчи пĕвесене шутласан тата ытларах. Хальхи вăхăтра «Яльчикское» ДПМК ĕçченĕсем шыв çурас хăрушлăх тухса тăракан пĕвесен шахтисене, шыв юхакан пăрăхсене тасатаççĕ. Районта çулсеренех Кавал, Питтĕпел, Кивĕ Эйпеç, Элекçей Тимеш ялĕсене шыв илес хăрушлăх тухса тăрать. Çавăнпа та унта пурăнакансен паянах тимлĕхе ÿстермелле.
Класс ертÿçисен конкурсĕ
Районта «Чи лайăх класс ертÿçи» конкурс старт илнĕ.
Йăлана кĕнĕ тупăшу яланхиллех 25 çул тултарман тата 25 çултан иртнĕ класс руководителĕсем хушшинче иртет. Конкурса виçĕ тапхăрпа йĕркелеççĕ. Чи малтанах шкул, унтан район, виççĕмĕшĕ – республика шайĕсенче. Республикăра çĕнтерекен класс ертÿçине 50 пин тенкĕ парса хавхалантараççĕ.
Çамрăк математиксем тупăшнă
Комсомольскинчи 2-мĕш шкулта республикăри яллă вырăнсенчи çамрăк математиксен зонăри иккĕмĕш турнирĕ иртнĕ.
Турнирта Комсомольски, Патăрьел, Шăмăршă, Елчĕк районĕсенчи 5-11 классенче пĕлÿ пухакан 40 ытла команда тупăшнă. Ачасем тĕрлĕ задачăсем шутланă, педагогсем семинар-практикума хутшăннă. Çĕнтерÿçĕсен йышне Курнавăшри А.Ефимова педагог ертсе пыракан саккăрмĕш класра вĕренекенсем те кĕнĕ: В.Федоров, А.Ефимов, Н.Иванов, М.Ефимова, Е.Васильева, А.Николаева.
Мускавра хĕр шыраççĕ
Елчĕк çамрăкĕсем, инçетри чăваш ялĕнче çуралса ÿссен те, пысăк хуласенче те нихăш енĕпе аптăрамаççĕ.
Пĕрремĕш каналпа «Давай поженимся» передачăна пирĕн икĕ ентеш хутшăнма хăраманни те çакнах çирĕплетет. Чăннипех те чăнкă Елчĕк йĕкĕчĕсем. Вăтам шкул хыççăн Санкт-Петербургра, ытти хуласенче хăйсен бизнесне уçаççĕ, арăм шыраса Мускава çитеççĕ.
Чи маттуррисем - Элпуçсем
Районти хуçалăхсенче паянхи кун тĕлне кашни ĕнерен талăкра 15,3 килограмм сĕт суса илеççĕ. Ку кăтарту иртнĕ çулхи çак вăхăтрипе танлаштарсан 300 грамм пысăкрах.
Чи пысăк сăвăм - «Эмметево» ОООра. Унта куллен кашни ĕнерен 21,7 килограмм сĕт суса илеççĕ. Чи пĕчĕк сăвăм - «Урожай» ОООра. Вĕсен кăтартăвĕ - 9,7 килограмм.