01 марта 2017 г.
Ялсенче граждансен пухăвĕсем вĕçленсе пыраççĕ.
Йăлана кĕнĕ тăрăх, ял тăрăхĕсенче иртнĕ çулхи пурнăçланă ĕçсем пирки тата малашлăх çинчен вĕсен пуçлăхĕсем отчетсем туса параççĕ.
Бюджетра палăртса хăварнă укçа-тенкĕпе туллин усă курасси тĕп вырăнта. Кăçал Раççейре Экологи çулталăкĕ пулнă май тирпей-илем кĕртессине малалла тăсасси, хытă каяшсене илсе тухасси те хумхантарать. Малашне ялсенче пухăннă пластик савăтсене, кĕленчесене, хут-хăмăра, çĕтĕк-çурăка, тимĕр-тăмăра килсенчех уйăрса суйлассине те пухусенче çĕклеççĕ. Сăмах май, «Юрга» ООО ертÿçи А.Дуткин вĕсене уйрăммăн илсе тухассине йĕркелесшĕн. Çакă çынсемшĕн те усăллă пулĕ, мĕншĕн тесен чĕртавара уйрăммăн пуçтарса паракансенчен ăпăр-тапăр тăкнăшăн укçа илмеççĕ. Тен, каярахпа укçа тÿлеме те май пулĕ.
Çынсемпе тĕл пулнă вăхăтра пай çĕрĕсене, çурт-йĕре, ытти пурлăха харпăрлăха куçарассипе, халăха социаллă пулăшу парассипе, ялсенчи урамсенчи çулсене çĕнĕрен тăвассипе, вĕсене юсассипе çыхăннă тата ытти ыйтусене те тишкереççĕ.
Ялăн пурнăçĕ тĕрлĕ енлĕ. Çавăнпа халăх шухăшне тĕплĕн пĕлсе сĕнĕвĕсене пурнăçламалли майсене палăртас тĕллевпе пухусене районти, ял тăрăхĕсенчи Депутатсен пухăвĕсен депутачĕсем, район администрацийĕн пайĕсен ертÿçисем, ялсен старостисем, полицин участоксенчи уполномоченнăйĕсем, пушар хăрушсăрлăхĕн ĕçченĕсем хутшăнаççĕ. Çакă çынсемшĕн те, вырăнти влаç представителĕсемшĕн те питĕ усăллă - пĕр-пĕрне ăнланни, ыйтусене пĕрле сÿтсе явни ĕçре пулăшать.