01 марта 2017 г.
Халăха йышăннă
Федерацин Чăваш Республикинчи тĕп инспекторĕ Г.Федоров районти çынсене хăйсен ыйтăвĕсемпе йышăннă.
Йышăнура районта пурăнакан 10 çын пулнă. Ыйтусем тĕрлĕрен: «вăрçă ачисене» пулăшу парасси, райадминистрацин вĕренÿпе çамрăксен политикин пайĕн методисчĕсен ĕç укçин калăпăшĕ, ĕçлекен пенсионерсене пенси тÿлесси, налуксем тата ытти те. Строительствăра нумай çул ĕçленĕ Н.Смирнова çамрăксене тата ытти çынсене пурăнмалли çурт-йĕр условийĕсене лайăхлатмалли патшалăх сертификачĕсене района пурăнма юлакансене çеç парас ыйту хумхантарать. Яла сыхласа хăварас тесен, çак ĕçе патшалăх шайĕнче йĕркелемеллех.
Йышăнăва килнĕ кашни çын ыйтусем çине тĕплĕ хурав илнĕ.
Йышăнăва район администрацийĕн пуçлăхĕ Н.Миллин, РФ Пенси фончĕн республикăри уйрăмĕн управляющийĕ Р.Кондратьева, Елчĕк районĕнчи пайĕн ертÿçи З.Яковлева, Федерацин налук службин республикăри управленийĕн ертÿçин çумĕ О.Никина, Комсомольскинчи районсем хушшинчи 2-мĕш инспекцин ертÿçи В.Антонов, район прокурорĕ В.Николаев хутшăннă.
Çур ĕмĕр пĕрле
Çак кунсенче Хăвăлçырмари Аркадий Сергеевичпа Феоктиста Никитична Казаковсем пурнăç çулĕпе 50 çул пĕрле утнине паллă тунă.
Çур ĕмĕр каялла çамрăк каччă кÿршĕ ялти хитре хĕре асăрханă. Хăйсен пурнăçне пĕрлештерме, савăнăçа та, хуйхăна та пĕрле пайлама килĕшсе татăлнă.
Унтанпа вăхăт нумай иртнĕ. Мăшăр хăйсен пĕтĕм пурнăçне тăван хуçалăхри ĕне ферминче ĕçлесе ирттернĕ. Феоктиста ĕне сунă, Аркадий скотникре тăрăшнă. Вĕсем 5 ача çуратса çитĕнтернĕ. Хальхи вăхăтра ватăсене 9 мăнукĕпе мăнукĕсен 2 ачи савăнтараççĕ, пурăнма хавхалантараççĕ.
Йыш хутшăнать
Район администрацийĕн ЗАГС пайĕ кăçал çуралнă 12 арçын ачапа 9 хĕрачана регистрациленĕ. Пĕлтĕр çак вăхăтра çуралнă 13 ачана шута илнĕ.
Çак кунсенче тин çеç çут тĕнчене килнĕ пепкен, çĕршывăн пулас хÿтĕлевçин Богдан Зайцевăн ашшĕпе амăшне - Елчĕкри Дмитрипе Светлана Зайцевсене ачан пурнăçри пĕрремĕш документне - ача çурални çинчен ĕнентерекен свидетельствăна тата Чăваш Республикин Пуçлăхĕн М.Игнатьевăн салам çырăвне панă.
Конкурсра палăрнă
Хусанта театр пултарулăхĕн «Альмандар еткерçисем» ачасен пĕтĕм тĕнчери II конкурс-фестивалĕ иртнĕ.
Вăрăмхăвари ял клубĕпе библиотекинчи «Илемпи» кружока çÿрекен Е.Казначеева та унта хутшăннă. Вăл С.Сергеевăн «Хăрушă тĕлĕк» сăввине вуланă, конкурс-фестивалĕн дипломне тивĕçнĕ.