22 февраля 2017 г.
Ярослав Николаевич Чермаков Курнавăш ялĕнче çуралнă, Çĕнĕ Пăвари вăтам шкултан, Çĕнĕ Шупашкарти ятарлă професси паракан училищĕрен, Шупашкар хулинчи автошкултан, И.Н.Ульянов ячĕллĕ Чăваш патшалăх университетĕнчен вĕренсе тухнă. ВЛКСМ Елчĕк райкомĕнче пай заведующийĕнче, Курнавăшри вăтам шкулта, Çĕнĕ Шупашкарти 18-мĕш лицейра преподавательте ĕçленĕ. Унсăр пуçне Шупашкарти агрегат, машинăсем тăвакан заводсенче, ГЭСстройра, Çĕнĕ Шупашкарти çуртсем тăвакан комбинатра вăй хунă.
- 1968 çулхи кĕркунне Совет Çарне призывпа лекрĕм. Служба Совет Çарĕсен Германири ушкăнĕнче иртрĕ. Хамăр ял каччисем Аркадий Смирнов, Федор Горшков та пирĕнпе çывăх çар чаçĕсенче службăра тăратчĕç. Эпĕ гварди танк ротине лекрĕм, - каласа парать запасри аслă лейтенант Ярослав Николаевич. - Пĕрремĕш занятинчех мана рота командирĕ хăйĕн спорт енĕпе ĕçлекен заместителĕ пулма çирĕплетрĕ. Запаса тухиччен çак должноçра службăна ирттертĕм. Салтаксене спорта явăçтарас енĕпе нумай вăй хума тиврĕ - спортăн тĕрлĕ енĕпе 10-шĕ спортсмен разрядник пулса тăчĕç. Хам та çар спорчĕн çичĕ енĕпе спорт мастерĕн кандидачĕн нормативне тултартăм. Тупă наводчикĕн профессине алла илтĕм. ГСВГра ирттерекен спорт ăмăртăвĕсенче темиçе хутчен икĕ пăтлă кире пуканĕ йăтассипе малти вырăнсене йышăнтăм. Çарпа политика вĕренĕвĕн отличникĕ пулса тăтăм. «Çар ĕçĕнчи паттăрлăхшăн. Владимир Ильич Ленин çуралнăранпа 100 çул çитнĕ ятпа» юбилей медалĕпе наградăларĕç. Манăн сăна полкри Хисеп галерейине кĕртрĕç. Взводри комсомол организацине ертсе пытăм. Полк командирĕ тĕл перессипе лайăх кăтартусем тунăшăн темиçе хутчен тав турĕ. 1969 çулхи майăн 9-мĕшĕнче - Çĕнтерÿ кунĕнче - хулара иртекен парада хутшăнма тивĕç пултăм.
Гварди рядовойĕ Я.Чермаков хăй çине илнĕ обязательствăсене яланах чыслăн пурнăçласа пынă. Ун çинчен çар хаçачĕсенче статьясем çырнă, сăнÿкерчĕксене пичетленĕ. Ярослав Николаевич вĕсене халĕ те типтерлĕн, ятарласа хатĕрленĕ альбомра упрать. Акă, манăн алăра çар хаçатĕнче пичетленнĕ «Овладел двумя специальностями» статья: «Шла танко-стрелковая тренировка. На первом учебном месте по команде «К бою!» члены экипажей быстро занимали свои места в машинах. Танкисты тренировались в поимке целей, определяли расстояние до них.
На втором - воины учились правильному заряжению танковой пушки штатным артвыстрелом, до автоматизма оттачивали каждое движение.
Особенно ловко действовал при орудии рядовой Я.Чермаков. Чувствовалось, что воин доволен собой: норматив по заряжению орудия штатным выстрелом им перекрыт.
Но успех пришел не сразу, в нем заложен большой труд. Хорошо помнятся Чермакову его первые шаги. Все как то мешало молодому солдату: и места в танке было мало, и развернуться негде, и снаряд тяжелый.
Систематические тренировки, помощь опытных товарищей, стремление добиться своей цели - стать отличным заряжающим, - все это, вместе взятое, привело танкиста к успеху. Упражнение по стрельбе из танка штатным снарядом экипаж выполнил на отлично. В этом немалая заслуга и заряжающего Я.Чермакова.
Есть чему поучиться у рядового Я.Чермакова воинам подразделения. Любит он свою военную специальность, серьезно относится к делу. Часто воина можно увидеть с книгой в руках перед макетом танковой пушки. Я.Чермаков решил овладеть специальностью наводчика орудия. И цели своей достиг. Теперь он владеет двумя специальностями».
Çар отличникĕн Я.Чермаковăн сăнÿкерчĕкĕсене дивизире тухса тăракан хаçатра пичетленĕ номерсем те пур альбомра.
Танк командирĕ запаса сержант званипе тухнă. 1989 çулта ăна запасри аслă лейтенант званине панă.
Ĕçне кура - хисепĕ. Служба хыççăн хăйĕн ĕçне чунтан юратакан, анлă тавракурăмлă специалиста ВЛКСМ Чăваш обкомĕ Шупашкарти ГЭС тунă çĕре комсомол путевкипе ĕçлеме кайма сĕнет. Вăл хаваспах килĕшет. Кĕске вăхăт хушшинчех бетонщик тата слесарь-монтажник профессийĕсене алла илет. Хăй мĕн пĕлнине, опытне ĕçри юлташĕсене вĕрентет. Темиçе çул пĕр улшăнмасăр «Пăрахут сооруженийĕсен» строительствăпа монтаж управленине йĕркеленĕренпех, унти комсомол организацине ертсе пырать. Вăл ĕçлекен бригада çулсеренех строительствăпа монтаж ĕçĕсен планĕсене ирттерсе пурнăçлать, бригада подряд меслечĕпе ĕçлесе хăйхаклăха чакарса пырать, çĕршер пин тенкĕ укçа-тенкĕ перекетлет. Ахальтен мар ĕнтĕ бригадăна Чăваш комсомолăн премине параççĕ. Ярослав Чермаков комсомол премийĕн лауреачĕ ятне тивĕçет.
Кирек хăш организацире, предприятире, заводра ĕçлесен те вăл яланах пысăк авторитетпа усă курнă, хисепре пулнă. Запасри офицер, ветеран-пенсионер Ярослав Чермаков хăй утса тухнă пурнăç çулĕпе кăмăллă. Унăн наградăсем те нумай, вĕсен хушшинче ВЛКСМ Тĕп комитечĕн, Чăваш обкомĕн Хисеп грамотисем пур. «Социализмла ăмăрту çĕнтерÿçи» паллăпа, «ГОЭЛРОна - 60 çул» значокпа, «Хисеп Палли» орденпа наградăланă. Ленинла комсомол премийĕн лауреачĕ.
Ярослав Николаевич мăшăрĕпе - Галина Анатольевнăпа икĕ хĕр çуратса ÿстернĕ. Олеся механикăпа технологи техникумне хĕрлĕ дипломпа, Мускаври текстиль университетне пĕтернĕ. Çамрăксен «Управлени капиталĕ» проектне хатĕрлеме хутшăннă.
Леонилла Çĕнĕ Шупашкарти 5-мĕш вăтам шкултан кĕмĕл медальпе, И.Я.Яковлев ячĕллĕ Чăваш педагогика университетĕнчен хĕрлĕ дипломпа вĕренсе тухнă. Елчĕк районĕнчи Курнавăшри вăтам шкулта вырăс чĕлхипе литературине вĕрентет. 2010 çулта вăл Чăваш Енри чи лайăх учительсен конкурсĕнче çĕнтерÿçĕ ята çĕнсе илнĕ. Мăшăрĕпе - Алексей Пупинпа икĕ хĕрпе ывăл çитĕнтереççĕ.
И.ИНОХОДОВ.
Сăнÿкерчĕкре: запасри офицер Я.Чермаков.