22 февраля 2017 г.
Инвалидсене пулăшаççĕ
Чăваш Енри инвалидсене пулăшма Раççей Федерацийĕн бюджетĕнчен 24 миллион тенкĕ ытла укçа-тенкĕ уйăрма палăртаççĕ.
Чăваш Республикинче сусăр çынсен пурнăç условийĕсене май пур таран çăмăллатасси çине ытти чухне те пысăк тимлĕх уйăрма тăрăшнă. 2014 çултанпа ку енĕпе ятарлă программăсем /Доступная среда», «Социальная поддержка граждан»/ ĕçлеççĕ. Виçĕ çулхи тапхăрта асăннă программăсене пурнăçлама республика тата федераци бюджечĕсенчен пурĕ 478,8 миллион тенкĕ уйăрса панă.
Тÿлевсемпе тивĕçтернĕ
Официаллă майпа ĕçсĕр тесе йышăннă районти çынсене 2016 çулта пурĕ 1325859 тенкĕ пособи тÿленĕ. Тÿлевĕн пĕр уйăхри вăтам виçи 2753,5 тенкĕпе танлашнă.
Унсăр пуçне, халăха ĕçпе тивĕçтерекен районти центр килĕшĕвĕпе професси пĕлĕвĕ илнĕ, квалификацие ÿстернĕ 21 çынна 125671,77 тенкĕ /пĕр уйăхра 4099 тенке яхăн/ стипенди тÿленĕ.
Предпринимательсенче - пысăк шанăç
2016 çулта район территорийĕнче предпринимательлĕхĕн 600-е яхăн субъекчĕ ĕçленине шута илнĕ.
Çакăнпа та килĕшмелле: район экономикине аталантарассинче предпринимательсен тÿпи пысăк. Хальхи вăхăтра вĕсен структурине тĕплĕнрех тишкерес пулсан, предпринимательлĕх ытларах суту-илÿре тата обществăлла апатланура лайăх аталанса пынине куратпăр.
Иртнĕ çул та районта пурĕ 5 çĕнĕ объект: Елчĕкре «Охота. Рыбалка. Спорт», «Икринка», «Звениговский», «Океан» тата Лаш Таяпа ялĕнче Шупашкарти аш-какай комбиначĕн лавккисем уçăлнă. Çапла майпа малашне вĕсем ялсенче пурăнакансен ыйтăвĕсене туллин тивĕçтерессинче тата район экономикине тĕреклетессинче пысăк пуçарулăхпа тимлессе шанмалăх пур.
Çул-йĕр тытăмне аталантарас тĕллевпе
Чăваш Ен Пуçлăхĕ Михаил Игнатьев Патшалăх Канашне янă черетлĕ Çырăвĕнче çул-йĕр тытăмне аталантарассине те тĕп вырăна хурать.
«Мĕншĕн тесен вăл Чăваш Ен экономикин аталанăвĕ тата çынсем хăйсене пурнăçра мĕнлерех туйни çине тÿрремĕн витĕм кÿрет», - тет вăл.
Асфальтлă - такăр та тикĕс автомобиль çулĕ пулмасан паянхи пурнăçра май та çук. Çакна тĕпе хурса районта çул-йĕр строительствин ыйтăвне тĕп вырăна хураççĕ. Иртнĕ çул та Мучар тата Тĕмер ялĕсем хушшинчи 1,1 çухрăм çула 11 миллион та 779 пин тенкĕлĕх асфальт сарнă. Ял тăрăхĕсенче - 7 объектра ялсем хушшинчи çулсене вак чул сарса хытарнă.