22 февраля 2017 г.
Кашни çул Раççей шайĕнче «Диво России» конкурс иртет.
Унта Елчĕкри историпе тăван тавралăх халăх музейĕ те хутшăнчĕ. Конкурса хутшăнакансем хăйсем хатĕрленĕ видеороликсене электрон почтипе ярса параççĕ. Эпир те хамăр районти паллă вырăнсемпе çутçанталăк палăкĕсем çинчен каласа паракан видео тăратрăмăр. Хамăр район çинчен хатĕрленĕ презентаципе Раççей çыннисем кăна мар, ют çĕршывра пурăнакансем те паллашма пултараççĕ. Видеороликре Аслă Таяпа хулашĕпе, Патреккел çăлкуçĕпе, Лаш Таяпари Турă Амăшĕ çурални ячĕллĕ чиркÿпе, Елчĕкри историпе тăван тавралăх музейĕпе, Кавалти Николай Казаков килĕнчи музейпе, районти палăксемпе, Лаш Таяпари акар йыттисен питомникĕпе, Элпуçри кану вырăнĕпе тата районтан тухнă паллă çынсен кун-çулĕпе паллаштартăмăр. Интернетра пĕтĕм Раççей туризмне кăтартакан «Путешествуй дома» портал пур. Унта районта кашни уйăхра иртекен пысăк пулăмсен календарĕпе те интересленме пулать.
Килте ларсах турист пулма пултарни пит аван. Интересленмелле кăна.
С.СТЕПАНОВА.