18 февраля 2017 г.
Нарăс уйăхĕн 15-мĕшĕнче, Комсомольски районĕнче «Ачалăх ячĕпе, ачалăхшăн» марафон уçăлнă.
Паллă пулăма Чăваш Республикин Пуçлăхĕ Михаил Игнатьев хутшăннă. Палăртса хăваратпăр, Михаил Игнатьев марафонăн йĕркелÿ комитечĕн председателĕ.
Ыркăмăллăх марафонĕн тĕллевĕ - ачалăха хÿтĕлесси тата пулăшасси. Тĕрĕссипе, пухмача кам мĕн чухлĕ хывни мар, çул çитмен ентешĕмĕрсен пурнăçне лайăхлатмашкăн пирĕнтен кашниех чун ăшшине хĕрхенменни хаклă. Ăнтăлуллă çамрăксене пулăшса вĕсене патриотизм воспитанийĕ парасси, аслă ăру çыннисене хисеплеме вĕрентесси - пирĕн тивĕç. Кун пирки Чăваш Ен Пуçлăхĕ уйрăммăн палăртса хăварнă. «Ачалăх ячĕпе, ачалăхшăн» марафон миллионшар çынна пĕр чăмăра пуçтарать. Кашни çын хăйĕн тÿпине хывма тăрăшать. Укçа-тенкĕне уçăмлăн, тухăçлă тăкаклани те куçкĕретех. Пулăшăва нумай ачаллă çемьесене, йывăр çемьесенче ÿсекен ача-пăчасене, вĕсем валли кирлĕ пек эмелсем, тĕрлĕ вĕрентÿ хатĕрĕсем, кĕпе-тумтирсем илме укçана тăкакланă», - тесе каланă Михаил Игнатьев. Патшалăх политикин тĕп çул-йĕрĕсенчен пĕри çĕршыва юрăхлă граждансем çитĕнтересси пулнине асăннă. Çак тема паянхи пурнăç таппинче уйрăмах пысăк пĕлтерĕшлĕ. Чăваш Енре кăçал Амăшĕпе Ашшĕн çулталăкĕ тесе йышăннă. Çемьери йăла-йĕркесене тытса пыни, амăшĕн тата ашшĕн витĕмлĕхне ăша хывни çамрăксене тĕрĕс çул çине тăма пулăшать, ун пек чухне çемьесенче те ача-пăча тĕрĕс-тĕкел, лайăх воспитани илсе çитĕнеççĕ. Михаил Игнатьев кăçал тата та ытларах ырă ĕçсем йĕркелесе ирттерме палăртнине пĕлтернĕ мероприятине пухăннисене. Марафонăн ĕç кăтартăвĕсем пирки «Раççейри ача-пăча фончĕ» обществăлла организацисен ыркăмăллăх фончĕн Чăваш Енри уйрăмĕн правлени председателĕ, Чăваш Республикин Патшалăх Канашĕн депутачĕ, Шупашкарти 2-мĕш номерлĕ çăкăр завочĕн директорĕ Юрий Кислов тĕплĕн каласа кăтартнă. Пĕлтĕр марафон пухмачне 8 млн тенкĕ пухăннине пĕлтернĕ. Кăçал марафон Каçал ен районĕнче старт илчĕ, мĕншĕн тесен çак муниципалитет ыттисемпе танлаштарсан, 2016 çулта марафон пухмачне укçа-тенкĕ куçарса парассипе чи малта пыракан район пулса тăнă. Палăртма кăмăллă, вĕсем пурĕ 400 пин ытла тенкĕ куçарса панă.
Пилĕк ача амăшĕ Оксана Козина хăйĕн сăмахĕнче нумай ачаллă çемьесене пулăшу панишĕн савăнса ертÿçĕсене тав тунă. Пухмача укçа-тенкĕ куçарса парас ĕçре Чăваш Республикин Патшалăх Канашĕн депутачĕсем, республикăри предприятисемпе организацисем, вак тата вăтам предпринимательлĕх пайĕнче ĕçлекенсем тăрăшуллă пулни сисĕнет. «Район укçа мĕн чухлĕ пуçтарать, çав пулăшу каяллах муниципалитета таврăнать, йывăр çемьесене куçать», - тенĕ Чăваш Республикин Патшалăх Канашĕн депутачĕ Юрий Попов.
Чăваш Енре çак мероприяти кăçалхипе 21-мĕш хут иртет. Юлашки тăватă çулта нумай ачаллă çемьесене, сахал тупăшлă, йывăрлăха кĕрсе ÿкнĕ ачасене, медицина учрежденийĕсене тĕрлĕ хатĕрсем туянма пурĕ 33 млн тăкакланă, ача сачĕсемпе шкулсене те сахал мар тимлĕх уйăрнă. Пултаруллă шăпăрлансене ятарлă стипенди пама йышăннă.
«Ачалăх ячĕпе, ачалăхшăн» ыркăмăллăх марафонĕн реквизичĕсене аса илтеретпĕр:
ЧРО ООБФ «Российский детский фонд»
ИНН 2128005408/КПП 213001001
Р/с 40703810075220160067 в Чувашском ОСБ/8613 г.Чебоксары
БИК 049706609, кор/с 30101810300000000609.