18 февраля 2017 г.
Воин-интернационалистсене асăнса
Районти тĕп библиотекăра «Раççей ывăлĕсен пысăк паттăрлăхĕ» асăну каçĕ иртнĕ.
Ăна совет салтакĕсене Афганистанран кăларнă куна тата оборонăпа массăллă спорт уйăхлăхне халалласа йĕркеленĕ. Мероприятие воин-интернационалистсен районти канашĕн председателĕ П.Анисимов, РФ Пенси фончĕн районти пайĕн начальникĕ З.Яковлева, халăхăн социаллă хÿтлĕх пайĕн тĕп специалисчĕ А.Борисова, О.Смирновăпа Р.Шакова врачсем хутшăннă. Паттăрсем уйрăмах «Книга памяти военнослужащих, погибших при исполнении обязанностей военной службы в мирное время» кĕнекепе кăсăкланса паллашнă. Культработниксен юррисем ветерансене самантлăха та пулин вăрçă ахрăмĕнчен тухма пулăшнă.
Унчченхи пекех, талăкăпех ĕçлĕ
Февраль уйăхĕнчен районти васкавлă пулăшу службин юридика адресĕ улшăннă. Вăл Шупашкара куçнă.
Халĕ район çыннисен васкавлă пулăшăва кирек мĕнле телефонпа та /карас е стационар/ диспетчер службине 103 е 6-17-32 номерсемпе шăнкăравламалла. Тăватă район халăхĕн сывлăхĕшĕн тимлекен тĕп служба Патăрьелĕнче вырнаçнă. Районта вара унчченхи пекех Аслă Пăла Тимеш тата Елчĕк бригадисем тăрса юлнă.
Пушар хыççăн пушар
Районта вутлă автан çулталăкĕ ыррăн пуçланмарĕ.
Çак тапхăрта районта 6 пушар алхасрĕ. Унта икĕ çын вилнĕ, иккĕн суранланнă.
Февралĕн 14-мĕшĕнче каçхине 20 сехет те 30 минутра Аслă Елчĕкре «хĕрлĕ автан» алхаснă. 45 çулхи арçын газ плитипе асăрхануллă пулманран кухня сиенленнĕ. Чей вĕретме лартнă арçын çывăрса кайнă. Тĕтĕм шăршипе вăраннă, вут-çулăма сÿнтерме тăнă. Анчах плита çумĕнчи япаласем çуннăран арçын пиçсе сиенленнĕ. Февралĕн 16-мĕшĕнче Патреккелĕнче 55 çулхи кил хуçин хуçалăхĕнче пушар пулнă.
Юратакансен кунĕнче пĕрлешнĕ
Районта кăçал 6 çемье чăмăртаннă.
Çветтуй Валентин кунĕнче пĕрлешсе ĕмĕр-ĕмĕр пĕр-пĕрне юратма, упрама сăмах пани пушшех илĕртÿллĕ пулĕ. Пĕр-пĕрне юратакансен кунĕнче районта Жуковсен çĕнĕ çемйи çуралнă.
Чи лайăххисен йышĕнче
Чăваш Республикин Культура, национальноçсен ĕçĕсен тата архив ĕçĕн министерстви ял тăрăхĕсенче вырнаçнă чи лайăх культура учрежденийĕсемпе ĕçченĕсем хушшинчи конкурса пĕтĕмлетнĕ.
Елчĕкри искусство шкулĕ «Муниципалитетăн чи лайăх искусство шкулĕ» номинацире çĕнтернĕ. Кунта 180 ача хушма пĕлÿ илет.
«Муниципалитет библиотекин чи лайăх ĕçченĕ» номинацире Курнавăшри Раиса Горшкова библиотекарь мала тухнă. Çĕнтерÿçĕсем грантсене тивĕçнĕ.