18 февраля 2017 г.
VII суйлаври Патшалăх Думинчи «Единая Россия» фракцийĕн ларăвĕнче тĕп тема Раççей Федерацийĕн промышленноçне аталантарасси пулнă. Унăн ĕçне парти ертÿçи, Раççей Правительствин Председателĕ Дмитрий Медведев хутшăннă.
«Гособоронзаказа» рекордлă шайра - 99 процент пурнăçланă. Кун пекки нихăçан та пулманччĕ», - пĕлтернĕ Дмитрий Медведев. Вăл палăртнă тăрăх, ют çĕршывсене çар хатĕрĕсем 15 млрд долларлăх сутнă. Премьер оборона промышленноçĕн комплексĕн предприятийĕсем çар продукцийĕсене туса кăларассине 10 процент таран ÿстернине пĕлтернĕ. «Çитĕнÿсем уйрăмах авиастроенинче курăмлă. Кунта çар продукцине туса кăларассине 3,5 процента яхăн, граждан авиацин продукцине - 20 процент ÿстернĕ», - пĕлтернĕ Дмитрий Медведев.
Вăл палăртнă тăрăх, экспорта малашне те ÿстермелле, çавăнпа продукци пысăк пахалăхлă, виçеллĕ хаклă пулмалла. Юлашки çулсенче промышленность патшалăх енчен пысăк пулăшу илнĕ. Акă, гражданла тĕллевлĕ продукци туса кăларма 237 млрд тенкĕ уйăраççĕ.
Дмитрий Медведев социаллă пурнăçпа экономика аталанăвĕн ыйтăвĕсене татса панă чухне регионсенчи саккунсем кăларакан влаç органĕсенчи парти фракцийĕсем регионсенчи правительствăсемпе çыхăнса ĕçлеме кирлине палăртнă.
Регионти уйрăмĕн секретарĕ Николай Малов çапла палăртать:
_ Чăваш Енре «Единая Россия» депутачĕсем тахçанах ĕç тăвакан влаçпа, вырăнти хăйтытăмлăх органĕсемпе çыхăнса ĕçлеççĕ. Эпир 2015-2016 çулсенчи суйлавсем тапхăрĕнче Чăваш Ен Пуçлăхĕ ертсе пыракан пĕрлĕхлĕ командăна йĕркелерĕмĕр.
Регионти политканашăн, унăн Президиумĕн йышне министрсем те кĕреççĕ. Социаллă пурнăçпа экономика аталанăвĕн тĕп ыйтăвĕсене пĕрле сÿтсе яватпăр, пĕрлехи йышăну патне тухатпăр.
Çавăн пекех тачă çыхăнăва районсенчи тата хуласенчи Депутатсен пухăвĕнче те йĕркелеме тăрăшатпăр. Патшалăх Канашĕпе вырăнсенчи Пухусен çыхăнăвне йĕркелес енĕпе хуласемпе районсенчи депутатсен корпусĕн ертÿçисемпе - хуласемпе районсен пуçлăхĕсемпе тата Патшалăх Думинчи Алена Аршиновăпа Леонид Черкесов депутатсемпе канашлу ирттертĕмĕр. Мероприяти ăнăçлă иртрĕ - малашне те çакнашкал тĕлпулусем йĕркелесшĕн, вĕсене Чăваш Енĕн правительствин членĕсене те чĕнесшĕн.
Пирĕн партин çĕнĕ проекчĕсене - «Хулари тавралăх», «Ачасене - сывлăх», «Вырăнти культура çурчĕ», «Пĕчĕк хуласен театрĕ», «Пĕчĕк хуласенчи парксем» - республика хутшăнмалли майсене сÿтсе явмалла. Акă, Чăваш Енĕн Культура министерстви «Вырăнти культура çурчĕ», «Пĕчĕк хуласен театрĕ» проектсене хутшăнма заявкăсем янă. Пурлăхпа техника никĕсне çĕнетме ялсенчи 24 культура çуртне, Улатăрти культура çуртне, юсав ĕçĕсем пурнăçлама ялсенчи 31 культура çуртне суйласа илнĕ.
Çавăн пекех Шупашкарти 47 картишпа 15 сквера «Хулари тавралăх» программăна кĕртеççĕ.
Депутатсемпе ĕç тăвакан влаç пĕрле çыхăнса ĕçлени тĕп тĕллевсене пурнăçланă чухне «Единая Россия» фракцин ĕç-хĕлĕн тухăçлăхне ÿстерет.