04 февраля 2017 г.
«Елчĕкри çăкăр завочĕ» сахал яваплă юлташлăх район халăхне тĕрлĕ изделисемпе савăнтарать.
2016 çулта 329 тонна, вăл шутран 5,6 тонна кондитер, 13,8 тонна кулинари, 6,6 тонна сухарипе сушка, 303 тонна çăкăр-булка изделийĕсем кăларнă. Çăкăр завочĕн продукцийĕсене районти лавккасем çеç мар, вĕренÿ тата халăха социаллă пулăшу паракан учрежденисем те илсе тăраççĕ. Кÿршĕллĕ пурăнакан Тутарстан Республикинчи ял çыннисем те Елчĕксен çăкăр-булка изделийĕсене кăмăллаççĕ.
Кунтах 10 тĕрлĕ пылак шывпа квас кăлараççĕ. Çак продукцисене вĕсем республикăри чылай районсене ăсатаççĕ.
Юлашки çулсенче завод çуртне юсассипе, цехсене çĕнетессипе, çĕнĕ оборудовани вырнаçтарассипе палăрмалла ÿсĕмсем тунă. Çавăн пекех автопарка çĕнетме те мехел çитернĕ. Обществăра 19 çын ĕçлет. Вĕсен уйăхри вăтам ĕç укçи 12 пин тенкĕпе танлашать.
Коллективра кашнийĕшĕ харпăр хăй ĕçĕнче пысăк хастарлăхпа вăй хунине палăртать завод учредителĕ Александр Филиппов. Общество директорĕ Алевтина Кузьмина район экономикине аталантарассинче пысăк тÿпе хывнăшăн иртнĕ çул районти Хисеп хăми çине кĕчĕ. Çак сферăра чылай çул ĕçлесе паха опыт пухнă Алевтина Владимировна коллективра ят-сум çĕнсе илнĕ.
Район администрацийĕн пуçлăхĕ Николай Миллин иртнĕ юнкун çăкăр завочĕн ĕç-хĕлĕпе паллашнă, производствăна малалла аталантарма, тавар туянакансен йышне ÿстерме ăнăçу суннă.
Сăнÿкерчĕкре: А.Кузьмина.