04 февраля 2017 г.
Кăçалхи февралĕн 1-мĕшĕнче Раççей Пенси фончĕн Чăваш Республикин уйрăмĕнче республикăри ветерансемпе инвалидсен обществăлла организацийĕсен ертÿçисемпе «çавра сĕтел» иртнĕ. Унта аслă ăрăва патшалăх енчен пулăшу парас ыйтусене тишкернĕ.
Видеоçыхăну мелĕпе йĕркеленĕ канашлăва республикăри хуласемпе районсенчи ветерансен обществăлла организацисен ертÿçисем, халăха социаллă пулăшу паракан органсен, массăллă информаци хатĕрĕсен представителĕсем - пурĕ 120 ытла çын хутшăннă.
Раççей Пенси фончĕн Чăваш Республикинчи уйрăмĕн управляющийĕ Роза Кондратьева пенси саккунĕсенчи çĕнĕлĕхсемпе паллаштарнă. Çак ыйтупа çыхăннă материалпа «Елчĕк ен» хаçатăн паянхи номерĕнчи 2-мĕш страницăра паллашма пулать.
Видеоканашлура вăрçăпа ĕç, хĕç-пăшаллă вăйсен, право сыхлавĕн органĕсен ветеранĕсен республикăри канашĕн председателĕ Генрих Васильев, Раççей пенсионерĕсен пĕрлĕхĕн Шупашкарти Калинин районĕнчи уйрăмĕн председателĕ Наталья Михеева, Пĕтĕм Раççейри инвалидсен обществин республикăри уйрăмĕн председателĕ Маргарита Кузьминых, Афганистанри вăрçă инваличĕсен обществăлла организацийĕн республикăри уйрăмĕн ертÿçи Геннадий Матвеев малашне пурнăçламалли тĕллевсем çинче чарăнса тăнă, ыйтусем çине хуравланă.
Обществăлла организацисен ертÿçисене Раççей Пенси фончĕн Чăваш Республикинчи уйрăмĕ хатĕрленĕ брошюра ăнлантару ĕçĕсене пурнăçланă чухне пысăк пулăшу пама тивĕç.