04 февраля 2017 г.
Тав çырăвне тивĕçнĕ
Республика Пуçлăхĕн пуçарăвĕпе килĕшÿллĕн Çĕнĕ çул умĕн йĕркеленĕ «Чăваш Ен çутисем» конкурса пĕтĕмлетнĕ.
Конкурсра тĕрлĕ критерие тĕпе хурса мала тухнисене пилĕк ушкăнпа хакланă. Пирĕн район, ял тăрăхĕсем çĕнтерÿçĕсемпе призерсен йышне кĕреймен. Çапах йĕркелÿ комитечĕ Елчĕк ял тăрăхĕ паха материалсем тăратнине палăртнă, Чăваш Республикин Министрсен Кабинечĕн Тав çырăвне тивĕçнĕ.
Раççей конкурсĕн çĕнтерÿçи
2016 çулхи октябрĕн 1-мĕшĕнчен пуçласа декабрĕн 23-мĕшĕччен Пĕтĕм Раççейри «Пĕтĕмĕшле вĕренÿ организацийĕсен сайчĕсен кĕрешĕвĕ – 2016» конкурс иртнĕ.
Ăна «Электронный Арбитраж» коммерциллĕ мар организаци йĕркеленĕ. Лаш Таяпари В.В.Андреев ячĕллĕ шкул сайчĕ /администраторĕ – В.Павлова/ «Все гениальное просто» номинацире пĕрремĕш вырăн йышăннă. Шкула диплом тата сайта лартмалли электрон медаль парса чысланă.
Фестивале хутшăннă
Халăх пултарулăхĕн республикăри центрĕпе Чăваш наци радиовĕ фольклор коллективĕсен «Иксĕлми çăлкуçсем» фестивальне виççĕмĕш хут ирттернĕ.
Унта Тутарстанри, Чĕмпĕр, Самар облаçĕсенчи, республикăри пултарулăх ушкăнĕсем хутшăннă. Пирĕн районти Вырăскассинчи «Шанăç» халăх фольклор ушкăнĕ те гала-концерта хутшăнма тивĕçнĕ. Коллектив «Çĕнĕ хăта юрри» шăрантарса III степень диплома тата хаклă парнене тивĕçнĕ.
Конкурс старт илнĕ
Йăлана кĕнĕ тăрăх, районта çулсерен иртекен «Хавхалану çăлкуçĕсем» фестиваль-конкурс пуçланнă.
Экологи, Амăшĕпе Ашшĕн çулталăкĕсене халалланă юрă-ташă фестивалĕ чи малтанах Кĕçĕн Таяпара иртнĕ. Культура ĕçченĕсемпе пултарулăх кружокĕсене çÿрекен ялти артистсем куракансене савăнăç парнеленĕ.
Кадетсен балĕнче
Республикăри «Тăватă çĕнтерĕвĕн балĕ» бал ташшисен конкурсĕ хыçа юлнă.
Шкулсенче кадетсен 7-8 класĕсенче вĕренекенсем тĕрлĕ номинацисенче тупăшнă. Елчĕкри 7 «к» класра вĕренекен Мария Николаевăпа Данил Куприянов «Чи лайăх бал мăшăрĕ» конкурсра виççĕмĕш вырăн йышăннă.
Пĕрлĕхлĕ кун иртет
Вĕрентÿпе наука енĕпе ĕçлекен федераллă служба февралĕн 7-мĕшĕнче Пĕтĕм Раççейри «Ашшĕ-амăшĕ ППЭ памалли пĕрлĕхлĕ кун» ирттерет.
Чăваш Ен те çак акци çумне хутшăнать. Чăваш Республикин Вĕренÿпе çамрăксен политикин министерстви выпускниксен ашшĕ-амăшне вырăс чĕлхипе сăнавлă экзамен тытса пăхма сĕнет. Çакăн валли февралĕн 6-мĕшĕнчен 8 /8352/ 57-21-60 номерпе шăнкăравласа регистрациленмелле çеç.
Экзамен Шупашкар хулинчи Олимп резервĕсен училищинче /Шупашкар хули, Шкул проезчĕ, 3-мĕш çурт/ вырнаçнă. Сăнавлă ППЭ февралĕн 7-мĕшĕнче 11 сехетре пуçланать, 30 минутран ытла пымасть.