04 февраля 2017 г.
Елчĕкри искусство шкулĕн ÿкерес ăсталăха вĕренмелли класа ачасем йышлă çÿреççĕ.
Кĕçĕн класра вĕренекен ачан пултарулăхне тĕрлĕ енчен уçас тесен ытларах унăн тавракурăмне ÿстерме тăрăшмалла. Алла кăранташа тĕрĕс тытма вĕренни, пĕр вĕçĕмсĕр таса хут листи çинче тĕрĕс йĕрсем хăварса ÿкерни – куç виçипе тĕрĕс пайласа ÿкерме пулăшать. Çак хушма пĕлÿ паракан шкулта ачасем натюрмортсем ÿкернĕ чухне ытларах кулленхи усă курмалли предметсенче геометриллĕ фигурăсем курма вĕренеççĕ /тăваткал, çаврака, тăрăхла çаврака, конус.../.
Живопись урокĕсенче тĕрлĕ тĕссем хутăштарса сăрлама вĕренеççĕ, ÿкерчĕксенче тĕрлĕ çĕртен ÿкекен çутăпа усă курса предметсем мĕнрен тăнине тĕрĕс тĕспе кăтартса пама тăрăшаççĕ. Ытларах хире-хирĕçле тĕссемпе хăçан усă курмаллине, тĕсĕн пĕчĕк уйрăмлăхне курма вĕренсе пыраççĕ. Композици урокĕсем сывлăш уçлăхĕнчен тата калăпăшĕнчен тăраççĕ. Ачасем пулма пултарайман япалана пулнă пек туса пама та ăс пухаççĕ. Пĕр сăмахпа каласан, ÿкерес ăсталăха вĕренекенсем хăйсен пултарулăхне пур енлĕн кăтартаççĕ.
Манăн вĕренекенсем Раççей, республика, район шайĕнче иртекен конкурссене хутшăнса малти вырăнсемпе савăнтараççĕ. Марина Боброва, акă, Чăваш Республикин Пуçлăхĕн ятарлă стипендине тивĕçнĕ. Ÿкерме ăсталăх пухакан 16 выпускник хăйсене кирлĕ пĕлÿ илсе малалла аслă шкулсене çăмăллăнах вĕренме кĕнĕ.
Хушма пĕлÿ илекен ачасем çĕнĕ программăпа вĕренеççĕ. Вăл пĕчĕкренех ÿнер искусствине аталантарма тата пулас професси шайĕнче вĕренмелли программа шутланать. Унпа килĕшÿллĕн ÿкерес ăсталăха ачасем пилĕк çул вĕренеççĕ.
Р.ПАРФЕРЬЕВА,
Елчĕкри искусство шкулĕн преподавателĕ.