28 января 2017 г.
Елчĕкре музыка шкулĕ 1965 çулта уçăлнă. Ун чухне икĕ класс йĕркелесе 25 ачана хушма пĕлÿ илме йышăннă. Çулсем иртнĕ май шкул аталанса пынă. 2003 çулта илемлĕхе юратакан ачасем капăр та хăтлă çуртра вĕренме пуçланă. 1991 çулта музыка шкулне искусство шкулĕ ят панă.
Хальхи вăхăтра искусство шкулĕнче художество, вокал, халăх инструменчĕ, фортепьяно, ташă класĕсем ĕçлеççĕ. Вĕсене 180 ача çÿрет. Хушма пĕлÿ паракан шкула суйласа илнĕ ачасене кăна мар, хăйсен пултарулăхне аталантарас текен мĕнпур вĕренекене йышăнатпăр. К.Васильева, Р.Парферьева, О.Краснова, С.Краснов, Л.Доброхотова, О.Архипова, З.Павлова, С.Карамаликова тата В.Архипов преподавательсем ачасен пултарулăхне, культура интересĕсене ÿстерес тесе сахал мар тăрăшаççĕ.
Кашни педагог вĕренекенре тĕлĕнмелле хитре искусство тĕнчине уçма пулăшать. Коллективра аслă категориллĕ преподавательсем виççĕн. Юрлама, ташлама, ÿкерме, баянпа, купăспа, тăмрапа, гитарăпа, фортепьянопа калама вĕренес текенсем район центрĕнчен кăна мар, ун тулашĕнчен те йышлăн çÿреççĕ. Пирĕн вĕренекенсем Раççей, республика, район шайĕнчи конкурссемпе фестивальсене активлă хутшăнаççĕ, призерсемпе çĕнтерÿçĕсен йышне кĕреççĕ. Кăçалхи вĕренÿ çулĕнче кăна пирĕн ачасем район шайĕнчи 14, республика шайĕнчи 23 тĕрлĕ пултарулăх мерприятийĕсене хутшăнса палăрма пултарчĕç. Уйрăмах Екатерина Ертмакова, Герман Мурзакаев, Карина Сивкова ÿкерчĕксем ÿкерме, Татьяна Ткаченко, Валерия Шпилева тăмрапа, Олег Московский купăспа, Ирина Петрова гитарăпа калама, Лиза Казначеевăпа Лиза Молодова, Кирилл Чернов, Денис Герасимов, Анна Кузьмина, Ксюша Агеева юрлама ăста. Вĕсем юлашки çулсенче тĕрлĕ шайри конкурссенче дипломсене пĕрре мар тивĕçнĕ. Вĕсемех хăйсен пултарулăхне тăтăшах район çыннисене кăтартаççĕ. «Вдохновение» ташă ушкăнĕсене районта кăна мар, республикăра та лайăх пĕлеççĕ. Шел, кăçал ташă класĕ преподаватель çукран хăйсен ушкăнĕсене пуçтараймарĕ. Çитес вĕренÿ çулĕнче ташăçăсем йышлă пуласса шанас килет.
Искусство шкулĕнче пилĕк çул вĕренмелле. Кашни çулах 6,6 çултан пуçласа 14 çулчченхи 20 ытла ача хушма пĕлÿ илме кĕрет. Паллах, кунта пĕлÿ пухакан кашни ача паллă музыкант, художник, ташăçă пулаймĕ, çапах хушма пĕлÿ илнĕ вĕренекен ĕмĕр тăршшĕпех искусство тĕнчинчен аякра тăманни, кăмăл-сипет пуянлăхне çухатманни куçкĕретех. Мĕншĕн тесен эпĕ те, Л.Доброхотовăпа О.Краснова та, çак шкултах хушма пĕлÿ илнĕ. 51 çул хушшинче вара шкул 400 ытла вĕренекене анлă çул çине кăларнă. Вĕсенчен паллă юрăçсем те тухнă. Кам пĕлмест паян Елчĕк çăлтăрĕсене - Виталий Адюкова, Вячеслав Христофорова, Алексей Шадрикова, Алексей Московские, е çамрăкраххисене - Георгий Смирнова, Константин Федотова, Наталья Ĕнелпине...
Пултарулăх тĕнчи кашни ачана хăй патне кăчăк туртать. Хисеплĕ ашшĕ-амăшĕ, çĕнĕ вĕренÿ çулĕнче хăвăрăн ывăл-хĕрĕре пирĕн илемлĕх шкулне ертсе килĕр. Вăл кунта искусство тĕнчи пурнăçа илемлĕрех тунине хăй туйса илĕ.
В.АРХИПОВ,
Елчĕкри искусство шкулĕн директорĕ.
Сăнÿкерчĕкре: О.Московский.