25 января 2017 г.
Пенсионерсем активлă
Районти пенсионерсен пĕрлĕхĕн ларăвĕнче унăн ертÿçи Л.Горшкова хальхи вăхăтра чуна ыраттаракан ыйтусем çинче чарăнса тăчĕ.
РФ Пенси фончĕн Елчĕк районĕнчи пайĕн ертÿçи З.Яковлева пенси тÿлес ĕçри çĕнĕлĕхсемпе паллаштарчĕ. Хальхи пенсионерсене ĕлĕкхипе танлаштараймăн - эпир ватăлма шутламастпăр. Общество ĕçĕнче те, спортра та, канура та харсăр.
О.МИРОНОВА.
Тыл ветеранĕн – сумлă кун-çул
Курнавăшри Василиса Корнилова ĕç ветеранĕ 90 çулхи юбилейне паллă тунă.
Аттелĕхĕн Аслă вăрçин нуши-тертне астивнĕ, çамрăклах хуçалăх хирĕнче пилĕкне авнă Василиса Николаевна каярахпа шкулта тирпейлÿçĕре тăрăшнă. Унтанах тивĕçлĕ канăва тухнă. Сумлă тыл ĕçченне шкулта савăнăçлă лару-тăрура чысланă. Юбиляра Курнавăш ял тăрăхĕн пуçлăхĕ Ю.Смирнов, шкул директорĕ П.Кузнецов тата ыттисем саламласа парнесемпе Тав хучĕсем парса чысланă.
Кÿршĕсен опычĕпе паллашнă
Елчĕкри историпе тăван тавралăх музейçисем ыттисен ырă пуçарăвĕсене ĕçе кĕртессишĕн тимлеççĕ.
Вĕсем Комсомольскинчи «Çĕр тата çынсем» музейра пулса унти ĕçтешĕсен опычĕпе паллашнă çеç мар, хăйсен пултарулăхне те кăтартнă. С.Голубева заведующипе С.Степанова лектор-экскурсовод ирттернĕ мастер-класра кÿршĕсем тĕрлĕ меслетпе теттесем ăсталама, «Синель» çĕвĕ машинипе çĕлеме вĕреннĕ. Елчĕксене П.Юманов маçтăрăн гипсран хатĕрленĕ япалисем килĕшнĕ. Автор вĕсене хăнасене те парнеленĕ.
«Манăн атте» конкурс
Январĕн 20-мĕшĕнчен пуçласа февралĕн 22-мĕшĕччен районти ача-пăча сачĕсене çÿрекенсем хушшинче конкурс иртет.
Унта 3-7 çулсенчи ачасем хутшăнма пултараççĕ. Шăпăрлансем «Манăн атте», «Манăн аттен ырă чĕре», «Манăн атте - салтак» номинацисемпе ÿкерчĕксем ÿкермелле те ?8 ĕçрен ытла мар/ Елчĕкри искусство шкулĕн курав залне тăратмалла.
Тăван шкула манмасть
Йĕлтĕрпе чупассипе темиçе хут район чемпионĕн ятне тивĕçнĕ Сергей Горшков паян та сывă пурнăç йĕркинчен пăрăнмасть.
Спорт ветеранĕ хăй вĕреннĕ Аслă Елчĕк шкулĕн пурлăхпа техника базине çирĕплетес тесе пысăк тимлĕх уйăрать. Сергей Александрович шкула тăтăшах пулăшса тăрать. Хальхинче те вăл 15 мăшăр йĕлтĕр патакĕ тата йĕлтĕре сĕрмелли ятарлă маçсем парнеленĕ.
Асамлăх уявĕ
Паян студентсемпе Татьянăсем хăйсен кунне уявлаççĕ.
2005 çулта Раççей Президенчĕ Владимир Путин «Раççейри студентсен кунĕ» уява официаллă йĕркепе çирĕплетнĕ. Паян чиркÿсенче Çветтуй Татианăна асăнса кĕлĕсем иртеççĕ. Аслă шкулсенчи, колледжсенчи студентсем хĕллехи сессие ăнăçлă вĕçленĕ хыççăн тăван ялти культура çурчĕсенче хăйсен ячĕпе йĕркелекен уяв мероприятийĕсене хутшăнаççĕ.
«Атте-анне - кил ăшши»
ятпа курав уçăлнă Елчĕкри тĕп библиотекăн ачасен уйрăмĕнче.
Чăваш Енри Амăшĕпе Ашшĕн çулталăкне халалланă куравра Елчĕк шкулĕнче вĕренекенсем кĕнеке выставкипе интересленсе паллашнă. Л.Кудряшова заведующи вĕренекенсене «Атте - çĕршыв тата çемье хÿтĕлевçи», «Атте-аннепе пĕрле вулар» материалсем пирки тĕплĕн каласа панă.
/Район сайтĕнчен/.