25 января 2017 г.
Чăваш Ен Пуçлăхĕ Михаил Игнатьев Чăваш Республикин Патшалăх Канашне тата пĕтĕм чăваш халăхне çулленхи Çырупа паллаштарни - çулталăкри сумлă пулăм.
Иртнĕ эрнекун - кăрлачăн 20-мĕшĕнче пулса иртнĕ çак мероприятие район делегацийĕ йышĕнче пулса ăна итлеме хутшăннă тата Елчĕк тăрăхĕнче пурăнакан, общество пурнăçĕпе тан утакан çынсем çакна мĕнле хакланине ыйтса пĕлтĕмĕр.
Леонард Левый, район администрацийĕн пуçлăхĕн пĕрремĕш çумĕ - вĕренÿпе çамрăксен политикин пайĕн начальникĕ:
- Регион Пуçлăхĕн Çырăвĕ республика пурнăçĕн мĕнпур сферишĕн хăйне евĕр çирĕп никĕс пулса тăрать. Михаил Васильевич социаллă политика тĕлĕшĕнчи лару-тăрăва çирĕплетессипе сахал мар ĕçленине каласа кăтартрĕ. Анчах мĕн тунипе анчах лăпланса лармалла маррине те палăртрĕ.
Республика Правительстви граждансене социаллă хÿтлĕх парассипе çирĕп сăмах панине çак вăхăтченех тивĕçлипе пурнăçласа пынине уйрăмах пысăка хурса хаклатăп. Хальхи вăхăтра республикăра пурăнакансен пĕрре виççĕмĕш пайĕ - 400 пине яхăн çын тĕрлĕрен социаллă тÿлевсемпе усă курать. Вĕсене социаллă пулăшупа тивĕçтерме уйăракан укçа-тенкĕ тÿлевĕсем те кашни çул ÿссех пыраççĕ. Республикăра пурăнакан çынсене социаллă пулăшупа кирлине кура тата ятран палăртса тивĕçтерни, ачасене патшалăх енчен тĕрлĕ майпа пулăшни, ĕç ветеранĕсене кашни уйăхра 1100 тенкĕ тÿлеме майсем тупни Чăваш Ен ертÿлĕхĕ çынсен пурнăç шайне лайăхлатассишĕн мĕнпур енлĕн тăрăшнине яр уççăн ĕнентерет.
Чăваш Ен пурăнмалли хăтлă регионсен шутĕнче, çакна çирĕплетнине илтме те кăмăллă пулчĕ.
Гурий ФЕДОРОВ, Раççей Федерацийĕн тата Чăваш Республикин ялхуçалăхăн тава тивĕçлĕ ĕçченĕ, «Комбайн» ЯХПК председателĕ:
- Республика Пуçлăхĕ Патшалăх Канашне янă Çыру яланхи пекех тĕплĕ те анлă пулчĕ.
Чăваш Ене çĕр лаптăкĕсене кадастр учетне илессипе Раççейре лайăххисенчен пĕри тесе йышăннă. Усă курман çĕр лаптăкĕсене шута илессипе те Атăлçи федераци округĕнче малтисен шутĕнче. Апла пулин те Михаил Васильевич ку енĕпе çивĕч ыйтусем пуррине те пытармарĕ. Пирĕн вара пăшăрханмалли çук. Мĕншĕн тесен район ертÿлĕхĕ çине тăнипе çак çивĕч ыйтăва унчченех татса панă. Районти ялхуçалăх предприятийĕсемпе хресчен /фермер/ хуçалăхĕсенче кашни пусăм çĕр лаптăкĕпе туллин усă кураççĕ. Хальхи вăхăтра эпир те хамăрăн 2146 гектар çĕр лаптăкне агротехника йĕркине çирĕп пурнăçласа ĕçе кĕртнисĕр пуçне Аслă Таяпа тата Кĕçĕн Таяпа ялĕсенчи çĕрсем çинче /пурĕ 700 гектара яхăн/ ялхуçалăх культурисене туса илетпĕр.
«Комбайн» ЯХПКра ĕçлекен пĕр çыннăн уйăхри вăтам шалăвĕ хальхи вăхăтра 19 пин тенкĕ ытла. 2016 çулхи кăтартусем тăрăх çакă районти агропромышленность комплексĕнчи чи пысăк ĕç укçи шутланнă пулсан та çакна çителĕксĕр тесе шутлатăп. Мĕншĕн тесен производство тухăçлăхне кирлĕ шайра йĕркелесе пыракан республикăри пысăк предприятисенчи ĕç укçин вăтам виçи тата пысăкрах. Пирĕн тĕллев - вĕсемпе танлашасси. Тĕллеве пурнăçлас тесен ĕç тухăçлăхне, пысăк хака тивĕçекен экологи тĕлĕшĕнчен таса, пахалăхлă продукци туса илессине ÿстермелле.
Марина ПАВЛОВА, район администрацийĕн экономика, пурлăх тата çĕр хутшăнăвĕсен пайĕн начальникĕ:
- Чăваш Ен Пуçлăхĕ Çырура пĕчĕк тата вăтам предпринимательлĕх ĕçĕ-хĕлĕ пирки те тĕплĕн чарăнса тăнă. Чăваш Республикинче предпринимательсен - хăйсем çине шанса ĕçлекенсен хисепĕ ÿссех пырать. 2017 çул пуçламăшĕ тĕлне республика территорийĕнче 51 пин ытла пĕчĕк тата вăтам предпринимательлĕх субъектне шута илнĕ пулсан пирĕн районта вĕсем 600-е яхăн шутланаççĕ, хăйсен ĕçне кирлĕ шайра йĕркелесе пыраççĕ. Потребитель рынокĕнче 2016 çулта 5 çĕнĕ объект хута кайни те ырă пулăм тесе шутлатпăр. Мĕншĕн тесен район экономикине аталантарассинче предпринимательсен ĕçĕ хальхи вăхăтра уйрăмах пысăк вырăн йышăнать.
Юрий СМИРНОВ, Курнавăш ял тăрăхĕн пуçлăхĕ, районти Ашшĕсен канашĕн председателĕ:
- Михаил Васильевич иртнĕ çулталăкра пурнăçланă ĕçсене пĕтĕмлетрĕ, социаллă пурнăçпа экономика аталанăвĕн умра тăракан пысăк пĕлтерĕшлĕ тĕллевĕсене палăртрĕ. Анчах çакна вăл пĕтĕмпех пĕр шухăшпа: «Общество, çемье, кашни çын ырлăхĕ - чи пысăк хаклăх», - тенипе пĕрлештерчĕ. Амăшĕпе Ашшĕн çулталăкĕнче Патшалăх Канашне янă Çырура çак сăмахсем уйрăмах пĕлтерĕшлĕ пулнăн туйăнчĕç.
Аттепе анне - çемье тĕрекĕ, воспитани çăлкуçĕ. Çирĕп те килĕшÿллĕ çемье йĕркелеме вара ансат мар. Лайăх çемьесенче анчах çирĕп сывлăхлă, кăмăл-сипет тĕлĕшĕпе пуян чун-чĕреллĕ ачасем çитĕнеççĕ. Çакна тĕпе хурса малашне район шайĕнче йĕркелесе ирттерме палăртакан тĕрлĕрен мероприятисенче тĕслĕхлĕ çемьесен йăли-йĕркисем çинчен каласа кăтартассине малти вырăна хумаллине ăнланатпăр. Çамрăксене сĕнÿ-канашпа пулăшар. Мĕншĕн тесен вĕсем пулас ачан ашшĕпе амăшĕ.
Пирĕн районта та нумай ачаллă çемьесен хисепĕ çулсерен ÿссех пырать. Ача-пăча çирĕп сывлăхлă, телейлĕ çитĕнни вара чăн-чăн савăнăç. Вĕсенче - район, республика, çĕршыв пуласлăхĕ.
Николай БОГДАНОВ, педагогика ĕçĕн ветеранĕ, Кивĕ Арланкасси ялĕ:
- Чăваш Республикин Пуçлăхĕ Михаил Игнатьев Çырура республикăн социаллă тата экономика аталанăвĕ еплерех пулса пынине тата унăн малашлăхне палăртнă.
Çырура çамрăк ăрăва тарăн пĕлÿ, тĕрĕс воспитани пани республика аталанăвĕн никĕсĕ пулни çинчен асăрхаттарать. Çак тĕллевсене пурнăçа кĕртес тесен вĕрентÿ тытăмĕнчи органсен, шкулсенче ĕçлекен учительсен инноваци ыйтăвĕсене тăтăшах шута илмелле. Вĕрентÿ, шкул программисенче экономика ыйтăвĕсене те тĕпе хумалла.
Вĕренекенсене парта хушшинченех производствăра кирлĕ професси суйласа илме пулăшмалла.
Пĕтĕм Раççейри пĕтĕмĕшле пĕлÿ паракан чи лайăх организацисен рейтингне кĕнĕ республикăри шкулсем валли Чăваш Ен Пуçлăхĕн указĕпе килĕшÿллĕн уйăрса пама йышăннă 1 миллион тенкĕ укçа шкулсен коллективĕсене çĕнĕлĕхсене алла илессипе тата тăрăшса ĕçлеме хавхалантармалла.
Светлана АРХИПОВА ыйтса пĕлнĕ.