21 января 2017 г.
Чăваш Ен йăлара усă курнă каяшсене тирпейлемелли тата тĕп тумалли çĕнĕ тытăм йĕркелессипе «пилотлă» регионсен хисепне кĕрет.
Республика Пуçлăхĕ Михаил Игнатьев федерацин çутçанталăк ресурсĕсен тата экологи министрĕпе Сергей Донскойпа тĕл пулсан Экологи çулталăкĕнче пурнăçламалли мероприятисене, çав шутра каяшсене тирпейлемелли управлени тытăмне реформăлассине сÿтсе явнă.
Михаил Игнатьев регионта каяшсене тирпейлемелли тата тĕп тумалли тухăçлă тытăм йĕркеленнине, кунта экологи хăрушсăрлăхне тивĕçтерекен хăйнеевĕрлĕ темиçе проекта ăнăçлă хута янине, Çĕнĕ Шупашкарти тасатакан сооруженисен реконструкцине тата хытă каяшсен çĕнĕ полигонĕн строительствине РФ Правительстви çирĕплетнĕ мероприятисен планĕпе килĕшÿллĕн малалла тăснине палăртса каланă.
Çĕнĕ Шупашкарти тасатакан биологи сооруженийĕсен реконструкцине вĕçлени Атăла юхтарса кăларакан каяш шывсен виçине 100 хутчен чакарма май парĕ. Чăваш Ен Пуçлăхĕ тĕлпулура 2019 çулта Шупашкар хули 550 çул тултарасси, 2020 çулта Чăваш автономи облаçне туса хунăранпа 100 çул çитесси пирки те аса илтернĕ. Çак паллă пулăмсен вăхăтне республикăра территорисене тирпейлес енĕпе пысăк ĕçсем пурнăçлама палăртнине пĕлтернĕ.