18 января 2017 г.
Тунтикун район администрацийĕн пуçлăхĕ Николай Миллин райадминистрацин структура подразделенийĕсен, ял тăрăхĕсен, предприятисемпе организацисен ертÿçисен канашлăвне ирттернĕ.
Турра шыва кĕртнин уявĕнче - январĕн 18-20-мĕшĕсенче - ялсенче шыва кĕрсе тасалмалли 6 вырăн палăртнă: Аслă Таяпари, Хăвăлçырмари, Тĕмерти, Элпуçĕнчи, Елчĕкри таса çăлкуçĕсенче, Яманчÿрелĕнчи пĕвере. Çак вăхăтра вĕсенче тĕн çыннисем, полици, медицина, ял тăрăхĕсен администрацийĕсен работникĕсем пулаççĕ пулин те шыва кĕрекенсен асăрхануллă пулмалла. Уйрăмах чĕрепе юн тымарĕсен чирĕсемпе, юн пусăмĕпе чирлекенсен шыва кĕме юрамасть.
Кăшарни кунĕсем сивĕ килесси паллă. Çак вăхăтра Çĕнĕ çул уявĕнчи пек лару-тăру сиксе ан тухтăрччĕ. Ун чухне республикăра 25 çын шăнса вилнĕ, 25 пушар, çав шутра пирĕн районта 2 пушар тухнă. Çакăн çинчен район администрацийĕн социаллă программăсен пайĕн начальникĕ Виталий Рыбкин каласа панă.
2016 çулхи çар призывĕн итогĕсемпе район администрацийĕн пуçлăхĕн пĕрремĕш çумĕ - вĕренÿ тата çамрăксен политикин пайĕн начальникĕ Леонард Левый паллаштарчĕ. Чăваш Республикинчи çар комиссариачĕн Комсомольски тата Елчĕк районĕсен пайĕ урлă 88 çамрăк çар ретне тăнă. Вĕсенчен 49-шĕ Елчĕк район каччисем. Çар комиссариачĕн Комсомольски тата Елчĕк районĕсенчи пайĕ кĕрхи призыв итогĕсемпе республикăра иккĕмĕш /2015 çулта - виççĕмĕш/ вырăн йышăннă. Леонард Левый кĕрхи призыва ирттерсе яма хутшăннă мĕнпур çынна тав турĕ. Çитменлĕхсем те пур. Елчĕк, Аслă Пăла Тимеш, Аслă Таяпа ял тăрăхĕсенчи 7 çамрăк çара каясран пăрăнса юлнă.
Çарпа патриотизм темине малалла тăсса район администрацийĕн пуçлăхĕн пĕрремĕш çумĕ ку енĕпе районта пысăк ĕç тунине асăнчĕ. 1968 çултанпа республикăра, çав шутра районта та «Орленок», «Зарница» çарпа спорт вăййисем иртеççĕ. Елчĕксем вĕсенче лайăх кăтартусемпе савăнтараççĕ. Районти шкулсенче çавăн пекех 4 çарпа патриот клубĕ, 3 кадет класĕ уçăлнă.
2003 çултанпа çамрăксемпе студентсене пултарулăхри ăнтăлушăн Чăваш Республикин Пуçлăхĕн ятарлă стипендине парса чыс тăваççĕ. Ун виçи уйăхне - 1830 тенкĕ. Кăçал çак чыса районта 19 çамрăк тивĕçнĕ. Вĕсенчен 17-шĕ шкул ачи, 2-шĕ çеç производствăра тата сывлăх сыхлавĕнче тăрăшать. Канашлура район ертÿçисем ĕçлекен çамрăксене яла ĕçлеме хăварас тĕллевпе хавхалантарма сĕнчĕç.
«Россельхозцентр» ФГУн Елчĕк районĕнчи пайĕн начальникĕ Лидия Ишмуратова çуркунне акмалли пĕрчĕллĕ тата пăрçа йышши культурăсен вăрлăхĕсене кондицие лартас енĕпе пĕрлешÿллĕ тата фермер хуçалăхĕсем мĕнле ĕçленипе паллаштарчĕ /вăл хаçатăн паянхи номерĕнчи 1-мĕш страницăра пичетленет/.
Район администрацийĕн культура тата информаципе тивĕçтерекен пайĕн начальникĕ Антонина Александрова районăн 90 çулхи юбилейне халалланă мероприятисене йĕркелеме сĕнÿсем тăратма ыйтрĕ.