18 января 2017 г.
Елчĕк тăрăхĕнче аслă ăру çыннисем яланах хисепре. Вĕсенчен пĕри - Турханта пурăнакан Аркадий Иванович Пупин.
Чăваш АССР тава тивĕçлĕ ветеринари врачĕ, Аттелĕхĕн Аслă вăрçине хутшăннă, «Хисеп Палли» ордена, Чăваш АССР Верховнăй Совечĕн Президиумĕн Хисеп грамотине тивĕçнĕ Аркадий Пупин çак кунсенче хăйĕн 90 çулхи юбилейне паллă турĕ. Вăл мăшăрĕпе - Лидия Сергеевнăпа 4 ывăлпа 2 хĕр çуратса ÿстернĕ, пурнăçăн анлă çулĕ çине кăларнă.
Юбилей ячĕпе ветерана район администрацийĕн пуçлăхĕн пĕрремĕш çумĕ Леонард Левый, Курнавăш ял тăрăхĕнчи Депутатсен пухăвĕн ертÿçи Ростислав Турхан, Çĕнĕ Пăва ялĕнчи ветерансен канашĕн ертÿçи Алимпия Фомина саламланă, хаклă парнесемпе чысланă. Çĕнĕ Пăвари культура çуртĕнчи «Шанчăк» фольклор ушкăнĕ ветерана чăваш юррисемпе савăнтарнă.