14 января 2017 г.
Çĕнĕ çул, Раштав уявĕсем хыççăнах çĕршыври массăллă информаци хатĕрĕсенче ĕçлекенсем професси уявне паллă тăваççĕ. Йăлана кĕнĕ тăрăх, Раççей пичет кунĕ яланхиллех январĕн 13-мĕшĕнче килет. Ăна 1703 çулхи çак кун Мускавра Раççейре пĕрремĕш хут «Ведомости» пичет хаçачĕ пичетленсе тухнипе паллă тăваççĕ. Эпир вара, чăваш журналисчĕсемпе полиграфисчĕсем, 2000 çултан професси уявне кăрлач уйăхĕн виççĕмĕш вырсарникунĕнче паллă тума пуçăннă.
Аса илтеретпĕр, Чăваш Республикинче 157 массăллă информаци хатĕрне регистрациленĕ, çав шутра 87 хаçат, 31 журнал, 2 бюллетень, 1 сборник, 1 каталог, электронлă массăллă информаци хатĕрĕсем – 32, çавăн пекех 2 информаци агентстви, 1 электронлă периодика изданийĕ.
Пичет уявĕнче эпир, паллах, хамăр ĕçсене тишкерсе тухнă май, пичет кăларăмне пуян та тарăн содержаниллĕ тума пулăшакан хаçат тусĕсен, общество корреспонденчĕсен, ырă та сумлă ячĕсене аса илмесĕр тăма пултараймастпăр.
Иртнĕ çул редакци почтине 500 яхăн çыру килчĕ. Ялсенчи общество корреспонденчĕсем Раççейри Кино, Чăваш Енри Ĕç çыннин çулталăкĕсем мĕнле иртнине, ĕçпе палăрнă çынсен пархатарлă кун-çулне, пĕр сăмахпа, районта социаллă пурнăçпа экономика мĕнле аталаннине тĕплĕн çутатса пыма тăрăшрĕç. Хаçата кăсăклă та интереслĕ тума пулăшакан хастар тусăмăрсен ячĕсене аса илмесĕр иртеймĕн. Кам пĕлмест пулĕ чылай çул район хаçатĕнче ĕçленĕ, халĕ те куллен компьютер умĕнчен каймасăр тĕрлĕ интереслĕ статьясем çыракан Анатолий Тимофеева, тăтăшах алçырăвĕсемпе савăнтаракан Людмила Зайцевăна, Николай Малышкина, Анатолий Молоствова, Александр Сорокина /Елчĕк/, Петр Сидорова /Шупашкар/, Светлана Бариновăна, Юрий Гордеева /Кушкă/, Исония Волковăна /Хăвăлçырма/, Владислав Сазонова /Кÿлпуç/,
Зинаида Портновăна /Аслă Пăла Тимеш/, Ольга Мироновăна /Таяпа Энтри/, Владимир Московские /Акчел/, Людмила Енедеровăна /Тăрăм/, Рифкат Харисова /Сăрьел/, Васса Красновăна /Чăваш Тăрăм/, Венера Усановăна, Зоя Кулаковăна /Шăмалак/, Нинăпа Илья Левыйсене /Çирĕклĕ Шăхаль/ тата ыттисене те. Çавăн пекех РФ Пенси фончĕн Елчĕк районĕнчи пайĕн ертÿçи Зинаида Яковлева, Елчĕк прокуратурин, выльăх-чĕрлĕх чирĕсемпе кĕрешекен станцин ĕçченĕсем çĕнĕ саккунсемпе, положенисемпе тăтăшах паллаштарса тăчĕç.
Çак тусăмăрсем харсăр Автан çулĕнче те пирĕнпех туслă пуласса, çĕннисем хушăнасса кĕтетпĕр. Кăçал пирĕн районшăн паллă истори пулăмĕсемпе пуян çулталăк. Районăн 90 çулхи, район хаçачĕн 85 çулхи юбилейĕсем тата ытти паллă событисем пирки хамăр хаçат страницисенче статьясем пичетлĕпĕр. Çĕршывра Экологи, республикăмăрта Амăшĕпе Ашшĕн çулталăкĕнче пурнăçлакан ырă ĕçсемпе, сумлă ашшĕ-амăшĕн кун-çулĕпе паллаштарăпăр. Çавна май ялсенчи общество корреспонденчĕсен çутатмалли темăсем сахал мар. Хамăр тăрăхри кашни паллă пулăм район историйĕнче анлăн çырăнса юлтăр. Сиртен малашне те çырусем, шăнкăравсем кĕтетпĕр. Май пулсанах редакцие кĕрсе тухăр. Сирĕн çырăвăрсем, ырă сĕнÿ-канашăр пире кулленхи ĕçре хавхалантарса пыраççĕ.
Уяв ячĕпе сире, хисеплĕ туссем!