11 января 2017 г.
Район администрацийĕн пуçлăхĕ Николай Миллин кашни тунтикун ирттерекен канашлăва хальхинче райадминистрацин структура подразделенийĕсен, ял тăрăхĕсен, предприятисемпе организацисен пуçлăхĕсене кăна мар, ялхуçалăх производство кооперативĕсен, фермер хуçалăхĕсен ертÿçисене те чĕннĕ. Çакă та канашлура пысăк пĕлтерĕшлĕ ыйтусене сÿтсе явасса систерчĕ.
Ăпăр-тапăра суйласа пани усăллă
Район администрацийĕн пуçлăхĕ Николай Миллин пухăннисене Çĕнĕ çул тата Раштав уявĕсем ячĕпе саламларĕ, ырлăх-сывлăх, ăнăçу сунчĕ. 2017 çулта Раççейре Экологи, Чăваш Енре Амăшĕпе Ашшĕн çулталăкĕ тесе палăртнă. Иккĕшĕ те пысăк пĕлтерĕшлĕ. Район ертÿçи экологи ыйтăвĕ çинче тĕплĕн чарăнса тăчĕ. Чăнах та, тирпей-илем кĕртес, хăтлăх тăвас тĕлĕшпе Елчĕк районĕнче 16 çул каяллах çанă тавăрса ĕçлеме пуçланă. Çырма-çатрана, вăрман тăрăхĕсене ăпăр-тапăртан тасатнă. Унччен хĕлĕпе пуçтарăнса пыракан йăлари каяшсене халĕ нихăш урамра та кураймăн. Вĕсене палăртнă кун автомашинăпа илсе тухаççĕ. Йывăçсем те лартатпăр, ытти чылай ĕçе пурнăçлатпăр. Анчах çакăнпа кăна лăпланса лармалла-и? Çук! Çакăн пек шутлать район администрацийĕн пуçлăхĕ Николай Миллин. Экологи çулталăкĕнче пирĕн ачасен, мăнуксен асĕнче юлмалли ĕçсем пурнăçламалла. Иртнĕ ĕмĕрĕн 30-мĕш çулĕсенче тунă Тябуков кÿллине, Таяпа Энтринчи Морозов лартса хăварнă вăрмана халĕ те вĕсен ячĕпе аса илетпĕр-çке. Мĕншĕн ялсенче юшкăнпа тулнă кÿлĕсене тасатмалла мар, кану паркĕсем йĕркелемелле мар?
Николай Миллин экологи çулталăкĕнче «Юрга» ООО ертÿçи Александр Дуткин пуçарăвне ырăпа асăнчĕ. Халĕ вăл Елчĕкри свалкăна кÿрсе тăкакан ăпăр-тапăра сортлать. Пластик савăтсене, кĕленчесене, хут-хăмăра, тимĕр-тăмăра, çĕтĕк-çурăка суйласа продукци ĕçлесе хатĕрлекенсем патне ăсатать. Малашне Александр Дуткин вĕсене кил хуçалăхĕсенчех суйлаттарса ялсенчен уйрăммăн илсе тухассине йĕркелесе ярасшăн. Çакă ăпăр-тапăр тăкакансене те усăллă пулма тивĕç. Мĕншĕн тесен чĕртавара уйрăммăн пуçтарса паракансенчен укçа илмеççĕ. Ĕçĕ йĕркеленсе кайсан укçа тÿлеме майсем пуласса та пĕлтерчĕ Александр Дуткин. Тепĕр самант та кăсăклă: ялсенчен ăпăр-тапăр илсе тухнăшăн тăкаксене саплаштарма уйрăм çынсем те тÿленĕ, ял тăрăхĕсен бюджечĕсенчен те укçа уйăрнă. Район администрацийĕн пуçлăхĕн çумĕ Галина Анисимова пĕлтернĕ тăрăх, малашне çак тĕллевпе бюджетран укçа уйăрмаççĕ. Пĕтĕм тăкака уйрăм çынсен тÿлеме тивет. Çакă та çынсене ăпăр-тапăра суйласа пама хистемелле. Анчах чи малтан хамăр шухăшлава улăштармалла, çĕнĕлĕхе ырласа йышăнса пурнăçлама вĕренмелле.
Производствăна аталантарма
Канашлура пăхса тухнă тепĕр ыйту та пысăк пĕлтерĕшлĕ. Район администрацийĕн пуçлăхĕн çумĕ - финанс пайĕн начальникĕ Галина Анисимова районăн 2016 çулхи пĕрлештернĕ бюджечĕн пирвайхи кăтартăвĕсемпе паллаштарчĕ. Тупăшсем енĕпе ăна 343,3 млн тенкĕлĕх /101%/, расхутсем енĕпе 333,6 млн тенкĕ /96,3%/ пурнăçланă. Бюджет профицичĕ 9,7 млн тенкĕпе танлашать. 2016 çулта хамăр патăмăрта 84,8 млн тенкĕ тупăш илнĕ. Çакă 2015 çулхипе танлаштарсан 110,8 процент. Налуксем тата налуксем шутне кĕмен тупăшсем те виçĕмçулхинчен процентпа шутласан пысăкрах. Çакă районта тĕрлĕ ĕçсене пурнăçлама май панă.
Малалла Галина Анисимова Чăваш Республикин Пуçлăхĕн 2016 çулхи октябрĕн 28-мĕшĕнчи 156-мĕш номерлĕ «Муниципалитет районĕсемпе хула округĕсен вырăнти хăйтытăмлăх органĕсен ĕçĕ-хĕлне лайăхлатмалли хушма мерăсем çинчен» Указĕ, ăна пурнăçласси çинчен тĕплĕн чарăнса тăчĕ. Унăн итогĕсене пĕтĕмлетнĕ чухне 14 тĕрлĕ кăтартăва шута илеççĕ. Вĕсенчен чылайăшне район ăнăçлă пурнăçласа пырать. Анчах инвестици проекчĕсене ĕçе кĕртессинче çитменлĕхсем тĕл пулаççĕ. Çакă района каялла туртса пырать. Николай Миллин лайăх тĕслĕх вырăнне «Комбайн» ЯХПК, «Победа» ООО ĕçĕ-хĕлне аса илчĕ. Пĕлтĕр «Комбайн» 15 млн тенкĕлĕх фермăсене реконструкциленĕ. «Победа» ОООра та кăтартуллă ĕçлеççĕ. Кунти выльăх-чĕрлĕх витисене такам та ăмсанмалла. Витесенче таса та çутă. Ăратлă выльăхсен умĕнчен ăшă шыв, апат татăлмасть, çамрăк пăрусем таса та сывă, вĕсем типĕ улăм çинче выртса тăраççĕ. Çавна пулах ĕнтĕ «Победа» ОООра кашни ĕнерен 7000 кг сĕт сăваççĕ. «Комбайн» ЯХПКра та çавăн пек ĕçлеççĕ. Район администрацийĕн пуçлăхĕн шучĕпе çĕнĕлĕхсене вĕренме ют облаçсене кайса та çÿремелле мар, паха опыт юнашарах.
Николай Миллин 2017 çулта районта 9 тĕрлĕ инвестици проектне ĕçе кĕртме май пуррине палăртрĕ. Çапла вара кашни хуçалăхрах кăçал ĕне выльăхсен витисене реконструкци тумалла, çĕнĕ техника туянмалла. Паян пĕр вырăнта тăни, мĕн тунипе лăпланса ларни тепĕр темиçе çултан хуçалăх юхăнасси патне илсе пыма пултарать. Хальхи вăхăтра пысăк тупăш паракан отрасль - сĕт туса илесси çине пысăк тимлĕх уйăрмалла.
Уяв савăнăç кăна кÿтĕр
Канашлура Çĕнĕ çул вăхăтĕнче йĕркеленĕ мероприятисем çинчен культура тата информаципе тивĕçтерекен пай начальникĕ Антонина Александрова каласа пачĕ. Уяв кунĕсенче вĕренÿ, культура учрежденийĕсенче 100 ытла мероприяти йĕркеленĕ, спорт ăмăртăвĕсем йышлă ирттернĕ. Çĕнĕ çул умĕн предприятисене, учрежденисене илемлетес тĕлĕшпе йĕркеленĕ конкурсăн тепĕр пайне пĕтĕмлетнĕ. Предприятисемпе учрежденисем хушшинче пĕрремĕш вырăна районти тĕп больница йышăннă. Вăлах республикăри конкурсра та çĕнтернĕ. Иккĕмĕшпе виççĕмĕш вырăнсене Елчĕкри вăтам шкул, централизациленĕ библиотека системи тата «Прогресс» хуçалăх йышăннă.
Уйрăм кил хуçалăхĕсен тупăшăвĕнче пĕрремĕш вырăна Аслă Пăла Тимешри Александровсен çемйи мала тухнă.
Пĕчĕк бизнес тытса пыракансен ушкăнĕнче Елчĕкри Г.Чернов тата В.Дубинов палăрнă. Вĕсем район администрацийĕн Тав хутне тивĕçнĕ.
Ял тăрăхĕсен ушкăнĕнче Çирĕклĕ Шăхаль, Аслă Елчĕк, Курнавăш ял тăрăхĕсем малта.
Çĕнĕ çул тата Раштав уявĕсенчи оперативлă лару-тăрупа район администрацийĕн социаллă программăсен пайĕн начальникĕ Виталий Рыбкин тата Елчĕкри полици пайĕн начальникĕн çумĕ Алексей Карабурнашев паллаштарчĕç. Уяв кунĕсенче саккуна пăснă пысăк тĕслĕхсем пулман.