11 января 2017 г.
Пĕчĕк мăйăрăн тĕшши пысăк
Яллă вырăнсенче физкультурăпа спорта аталантарас, спорт юхăмĕн йăли-йĕркисене çĕнетес, сывă пурнăç йĕркине сарас енĕпе спорт залĕн пĕлтерĕшĕ пысăк.
Çакна шута илсе Элпуç ялĕнче спорт залне уçрĕç. Вăл райпо тытăмĕнче, каярахпа Ю.Лапшин харпăрлăхне куçнă лавкка пулнă çуртра вырнаçнă. Ăна тĕпрен юсаса çĕнетес тесе Лапшинсен çемйи, Кармалпа Элпуç ялĕсенче çуралса ÿснĕ çамрăксем нумай вăй хунă - 300 пин тенкĕ ытла тăкакланă. 250 пин тенкĕлĕх спорт оборудованийĕ туяннă.
Элпуç ялĕнчи спорт залĕ пысăках мар - 9х11 метр. Кунта кĕрешекенсем валли кавир, тренажерсем, раздевалка вырнаçтарма май тупнă.
Халĕ «Кармал» спорт залĕнче ватти те, вĕтти те хăйĕн ăсталăхне ÿстерме, сывлăхне çирĕплетме пултараççĕ.
Кĕнекесем парнеленĕ
Чăваш Республикин Патшалăх Канашĕн депутачĕ Ю.Попов Лаш Таяпари библиотекăна Чăваш кĕнеке издательстви кăларнă 200 кĕнеке парнеленĕ.
«Ялти библиотекăн кĕнекесен кивĕ фондне курсан манăн чунăм ырататчĕ. Çавăнпа эпĕ çĕнĕ кĕнекесем парнелеме тĕв тытрăм. Вĕсем библиотекăна пысăк усă парасса, вулакансене килĕшессе шанса тăратăп», - çапла палăртнă Юрий Алексеевич.
Кĕнеке вулама юратакансемшĕн библиотека алăкĕсем яланах уçă.
Çĕнĕ çулта - пĕрремĕш пепке
Ача çурални кашни çемьешĕн пысăк пулăм.
Район администрацийĕн ЗАГС пайĕнче 2017 çулта çуралнă пĕрремĕш ачана регистрациленĕ. Вăл, Соня ятлăскер, Аслă Елчĕкри Сергейпа Олеся Волковсен çемйинче кун çути курнă. Раççейĕн çĕнĕ гражданинне ЗАГС пайĕн ертÿçи Надежда Баймушкина çурални çинчен свидетельство панă.
Ветерана саламланă
Раштав уявĕ вăхăтĕнче 95 çул каялла çут тĕнчене килнĕ Яманчÿрел ялĕнчи Александра Павлова.
Ĕмĕрне тăван хуçалăхра ĕçлесе ирттернĕ ветеран мăшăрĕпе 1 ывăлпа 2 хĕр пăхса ÿстернĕ. Хальхи вăхăтра вăл Валентина хĕрĕ патĕнче пурăнать.
Ветерана сумлă юбилей ячĕпе районти Депутатсен пухăвĕн председателĕ И.Васильева, культура ĕçченĕсем, çывăх тăванĕсем саламланă, парне панă.
/Район сайтĕнчен/.