28 декабря 2016 г.
Виçĕмкун район администрацийĕн пуçлăхĕ Николай Миллин райадминистрацин структура подразделенийĕсен, ял тăрăхĕсен, предприятисемпе организацисен ертÿçисемпе канашлу ирттерчĕ.
Вутлă упăте çулталăкĕ лайăххине те, начаррине те илсе килчĕ. Шел, вырсарникун Адлертан вĕçсе тухнă самолет Хура тинĕсе ÿксе арканнă. 92 çын пурнăçран уйрăлса кайнă. Тунтикун Раççейре траур кунĕ тесе пĕлтернĕ. Канашлăва хутшăнакансем вилнисене асăнса пĕр минут шăп тăнă...
Грипп тата ОРВИ чирĕсем тата вĕсене асăрхаттарасси çинчен Роспотребнадзорăн Чăваш Республикинчи управленийĕн Патăрьелĕнчи территори пайĕн начальникĕн çумĕ Светлана Петрянкина каласа пачĕ. Хальлĕхе грипп чирĕ ернĕ пĕр çынна тупса палăртнă, ОРВИпе чирлекенсем ÿснĕ. Грипп чирĕ халăх хушшинче январь уйăхĕн вĕçĕнче - февраль уйăхĕн пуçламăшĕнче пирĕн тăрăха çитме пултарать тесе шутлаççĕ специалистсем. «Чир ертекенсем - А тата В вируссем, çĕнни те пур A/H3N2. Грипран вакцинаци тунă çынсем сахалтарах чирлеççĕ, чирĕ те вĕсен çăмăлтарах иртет, - терĕ Светлана Петрянкина. - Чир алхаснă вăхăтра çын хушшинче сахалтарах пулма тăрăшмалла. Чирлесе ÿксен киле врач чĕнмелле». Санитари врачĕ грипран сыхланмалли ытти сĕнÿсем те пачĕ. Грипа ОРВИ чирĕнчен уйăрса илмелли паллăсене асăнчĕ. Ертÿçĕсене коллективсенче чиртен сыхланмалли ĕçсене пурнăçлама сĕнчĕ.
Халăха социаллă хÿтлĕх паракан пай начальникĕ Ирина Аникина Чăваш Республикинчи социаллă пулăшу парассипе çыхăннă саккунсенчи улшăнусемпе паллаштарчĕ /тĕплĕнрех хаçатăн çитес номерĕсенче/.
Культура тата информаципе тивĕçтерекен пай начальникĕ Антонина Александрова каланă тăрăх, Çĕнĕ çул тата Раштав уявĕсем умĕн тата уявсем вăхăтĕнче тĕрлĕ мероприятисем йĕркелеме палăртнă. Декабрĕн 28-мĕшĕнче Елчĕкри тĕп лапамра ачасем валли йăлана кĕнĕ ача-пăча елкине уçаççĕ. Декабрĕн 29-мĕшĕнче Тÿскелте нумай функциллĕ культура центрне, юсав хыççăн Лаш Таяпари культура çуртне уçма планланă. Кану кунĕсенче ялсенчи хоккей площадкисем, спорт залĕсем ĕçлĕç, тĕрлĕ конкурссемпе викторинăсем йĕркелĕç. Тĕплĕнрех вĕсем çинчен район администрацийĕн сайтĕнчи «Çĕнĕ çул» баннерта паллашма пулать.
Канашлура район пурнăçĕпе çыхăннă ытти ыйтусене те сÿтсе явнă.