24 декабря 2016 г.
«Урожай» сахал яваплă обществăра юлашки çулсенче машинăпа трактор паркне çĕнетсех пыраççĕ.
Общество ертÿçи В.Кузнецов палăртнă тăрăх, энергие перекетлекен тата хăватлă техника хатĕрĕсем хуçалăхра хутшăнсах пыраççĕ. 2014-2016 çулсенче вĕсене 30 миллион ытла тенкĕлĕх туяннă. Çак вăхăтра туяннă «ACROS-570», «ACROS-585», «Вектор-410» йышши тĕш тырă çапса тĕшĕлекен комбайнсем вырма ĕçĕсене кĕске вăхăтра тата пахалăхлă пурнăçлама май параççĕ. Çавăн пекех Беларус-1523 трактор, КБК-8.0 культиватор, çĕнĕ плугсем те ĕçе ансатлатаççĕ, агротехника палăртнă вăхăтра ĕçе пурнăçлама пулăшаççĕ. Обществăра кăçал тыр-пул тухăçлă çитĕнчĕ - çакă минераллă удобренисене вăхăтлă та туллин хывнипе, çумкурăксене хирĕç ăнăçлă кĕрешнипе çыхăннă. Химиллĕ им-çамсене сапнă чухне ОВТ-2500 опрыскивательпе, навигаторпа усă курнă. Кăçал обществăра тĕш тырă тасатса типĕтекен комплекса та хута янă - унпа сехетре 50 тонна тырра ĕçлесе хатĕрлеççĕ.
КамАЗ автомашинăна прицеппа пĕрле туянни те ĕçе хăвăртлатма пулăшать.
А.КАРЛИН.