24 декабря 2016 г.
_Preview.jpg "Ĕçлĕ тĕлпулу")
Чăваш Республикин Пуçлăхĕ Михаил Игнатьев Елчĕк район администрацийĕн пуçлăхĕпе Николай Миллинпа ĕçлĕ тĕлпулу ирттернĕ.
Тĕлпулу вăхăтĕнче Елчĕк районĕн 2016 çулхи ĕç кăтартăвĕсене тата 2017 çулхи тĕллевсене пăхса тухнă, социаллă пурнăçпа экономика аталанăвĕн çул-йĕрĕсене тишкернĕ.
Николай Миллин хăйĕн сăмахĕнче районăн пĕрлештернĕ бюджетĕнче районта пухăннă тупăшăн шайĕ 25 процента çитнине, вăл 78 млн тенкĕпе танлашнине пĕлтернĕ. Çак кăтарту, пĕлтĕрхипе танлаштарсан, чылай пысăк. Ялхуçалăхне аталантарас ĕç те курăмлă пулса пынине асăннă. Кăçал 60641 тонна тырă çапса кĕртнĕ. Çакă 2011-2015 çулсенчи вăтам кăтартусенчен чылай пысăк - 145,2 процент.
«Елчĕк районĕ Ĕç çыннин çулталăкне ăнăçлă вĕçлет. Тĕш тырă пухса кĕртессипе те ыттисемшĕн тĕслĕх вырăнĕнче, кун пекки историллĕ пулăм. Тухăç пысăк пулни куçкĕретех», - тенĕ Михаил Игнатьев.
Николай Миллин Чăваш Ен Пуçлăхне Михаил Игнатьева раштав уйăхĕн 29-мĕшĕнче Тÿскелĕнчи нумай функциллĕ культура центрне уçнă çĕре хутшăнма йыхравланă.
Палăртса хăварар: Чăваш Республикинче ялсенче культура çурчĕсене тĕпрен юсасси йĕркеллĕ пулса пырать. Культура керменĕсем хальхи пурнăç таппипе тÿр килекен хатĕрсемпе пуянланаççĕ. Тÿскел ялĕнчи культура центрĕ Чăваш Республикин Пуçлăхĕ Михаил Игнатьев 2015 çулта юпа уйăхĕн 28-мĕшĕнче кăларнă 168 №-лĕ Указпа килĕшÿллĕн хута каять.
/Чăваш Республикин влаç органĕсен официаллă порталĕнчен/.