24 декабря 2016 г.
Юнкун район администрацийĕнче вăрçăпа ĕç, хĕç-пăшаллă вăйсен, право сыхлавĕн органĕсен ветеранĕсен районти канашĕн пленумĕ пулса иртнĕ. Ăна общество организацине туса хунăранпа 30 çул çитнине халалланă.
Тивĕçлĕ канăва тухнă çынсем пенсире те алă усса лармаççĕ. Чун киленĕçне вĕсем килти хуçалăх, пултарулăх ĕçĕнче тупаççĕ. Хальхинче те фойере ялти хĕрарăмсен алă ĕçне чылай тăратнă. Тĕрлесси, çыхасси чăваш хĕрарăмĕн пурнăçĕнче мĕн авалтан пырать-ха. Анчах вĕсен пултарулăхĕ ÿссе аталанса пыни куç умĕнче. Юрă-ташăра та маттур ĕç ветеранĕсем. Елчĕкри культура çурчĕ çумĕнчи Иван Шурбин ертсе пыракан ветерансен «Туслăх» хорне районта кăна мар, республикăра та пĕлеççĕ. Коллектив «Халăх хорĕ» ята çĕнсе илессишĕн кĕрешет. Çак ята чăннипех тивĕçлĕ вăл тесе шутлаççĕ пур çĕрте те. Пленум пуçланиччен хăйĕн пултарулăхне кăтартнă коллектива район администрацийĕн пуçлăхĕ Николай Миллин ырăпа асăнчĕ, ун руководительне Иван Шурбина Тав хучĕпе чысларĕ.
Районти информаци кунне килнĕ вĕренÿ тата çамрăксен политикин министрĕн çумĕ Светлана Петрова ялсене тухса каяс умĕн ветерансемпе курса калаçас терĕ. Ветерансем обществăпа политика пурнăçне активлă хутшăннине уйрăммăн палăртса каларĕ. Çакă пĕлтĕрхи тата кăçалхи суйлавсенче аван курăннă. Ватă çынсем сасăлавсене активлă хутшăннă.
Ветерансен канашĕн председателĕ Серафима Терентьева пуçламăш организацисен, уйрăм ватăсен ĕçĕ-хĕлне тишкерчĕ те вĕсен ĕçĕнчи нумай-нумай лайăх пулăма асăнчĕ: пенсионерсем çамрăк ăрăва патриотла воспитани пама хутшăнаççĕ, кĕнекесем çыраççĕ, спорт ăмăртăвĕсенче палăраççĕ, халăх пултарулăхĕнче вĕсем ăста.
Роберт Бобылев ветерансен организацийĕн историйĕ иртнĕ ĕмĕрĕн 50-мĕш çулĕсенчех пуçланнине аса илчĕ. Ун чухне вăл вăрçă ветеранĕсене кăна пĕрлештерсе тăнă. Каярахпа çак йыша ĕç ветеранĕсем, инваличĕсем, «хĕрÿ точкăсенчи» хирĕç тăрусене хутшăннă çынсем, милици ветеранĕсем кĕнĕ. Хальхи общество организацине 1986 çулта йĕркелесе янă. Роберт Бобылев тата СССР халăх учителĕ Петр Чернов иртнĕ ĕмĕрте ветерансен юхăмне ертсе пынă вăрçă участникĕсене, ĕçре туптаннă, вăрçă вучĕ витĕр тухнă, пурнăçран уйрăлса кайнă ентешсене ырă туйăмпа аса илчĕç. Вĕсен ĕçне хальхи ватăсем, ветерансен канашĕсен ертÿçисем малалла тăсаççĕ. Вĕсен йышĕнче Илья Левыя /Çирĕклĕ Шăхаль/, Алимпия Фоминăна /Çĕнĕ Пăва/, Николай Кириллова /Вырăскасси/, Геннадий Туманова /Çĕнĕ Эйпеç/, Клавдия Леонтьевăна /Елчĕк/ тата ытти нумай-нумай çынна асăнма пулать.
Ветерансен районти организацийĕн ялан ĕçлекен комиссийĕсене улттă йĕркеленĕ. Уйрăмах культурăпа кану комиссийĕ палăрса тăрать. Унăн председателĕ Галина Московская каланă тăрăх, пултарулăх ушкăнĕсем районти халăха юрă-ташăпа савăнтараççĕ, культура çурчĕсем çумĕнче тĕрлĕ клубсем, кружоксем ĕçлеççĕ.
Республикăри ветерансен канашĕн председателĕ Генрих Васильев Елчĕк районĕнчи вăрçăпа ĕç, хĕç-пăшаллă вăйсен, право сыхлавĕн органĕсен ветеранĕсен канашĕ республикăра чи лайăххисен йышĕнче пулни çинчен асăнса хăварни те пленума хутшăннисен чунĕсенче ăшă туйăм çуратрĕ. Вăлах ветерансен республикăри организацийĕн тĕрлĕ енлĕ ĕçĕ-хĕлĕ пирки тĕплĕн чарăнса тăчĕ.
Район администрацийĕн пуçлăхĕ Николай Миллин ветерансен районти организацийĕн ĕçĕ-хĕлĕпе интересленсе тăрать, сĕнÿсене йышăнать, ыйтусене кĕске вăхăтра татса пама тăрăшать. Акă, Чăваш Тăрăмĕнчен килнĕ педагогика ĕçĕн ветеранĕ Васса Краснова Чăваш Тăрăмĕпе Вырăс Тăрăмĕ ялĕсем хушшинчи кĕперĕн тепĕр енне вак чул сарса хытарас ыйтăва çĕклерĕ. Район администрацийĕн пуçлăхĕ кун çинчен пĕлет иккен. Аслă Таяпа ял тăрăхĕн администрацийĕн ĕç планĕнче çăва тухсан çак ĕçе вĕçлеме пăхса хăварнине пĕлтерчĕ. Район ертÿçи пĕрле ĕçлесен нумай ыйтăва татса пама пулнине асăнчĕ. Çывăх вăхăтра район центрĕнчи Иванов урамĕнче тăван тавралăх халăх музейне тума тытăнмалла. Пĕр çултах туса пĕтереймĕн ăна. Кăçал экономикăпа социаллă аталану ăмăртăвĕнче Елчĕк районĕ кăнтăр зонăра пĕрремĕш вырăн йышăннă, 10 млн тенкĕ премие тивĕçнĕ. Николай Петрович çак укçана музей тума уйăрассине пĕлтерчĕ. Районта ытти ĕçсем те ăнăçлă пыраççĕ: çулсене çĕнетеççĕ, урамсене асфальт сараççĕ, ФАПсем тăваççĕ, декабрĕн 29-мĕшĕнче Тÿскелте çĕнĕ клуба уçаççĕ. «Ĕçĕсем нумай, пурне те хальтерех тăвас килет, - терĕ Николай Петрович, - анчах укçа-тенкĕ ыйтăвĕ çивĕч тăрать. Район патшалăх уйăрнă укçа-тенкĕпе вăхăтра усă курса пырать. Кăçал пĕр район çул сарма уйăрнă укçа-тенке ĕçе кĕртеймен, ăна пирĕн района панă. Унпа Тĕмерпе Мучар хушшинчи 1,1 çухрăм çула асфальт сарса хытарма май килчĕ».
Пленумра ветерансен организацине тĕрлĕ мероприятисем йĕркелеме хуçалăх ертÿçисем, предпринимательсем пысăк пулăшу параççĕ. Серафима Терентьева вĕсене ятран асăнса тухса чĕререн тав турĕ. Вадим Чернов, Валерий Изратов, Татьяна Теплова, Леонид Григорьев предпринимательсем районти ветерансен канашĕн президиумĕн Тав хучĕсене тивĕçрĕç. Пĕтĕм Раççейри, республикăри ветерансен общество организацийĕсен Хисеп грамотисене Николай Миллина, Илья Левыя, Рифкат Харисова, Илья Трофимова, Владимир Щербакова парса чысларĕç.
Николай АЛЕКСЕЕВ.