21 декабря 2016 г.
Тунтикун район администрацийĕн пуçлăхĕ Николай Миллин райадминистрацин структура подразделенийĕсен, ял тăрăхĕсен, предприятисемпе организацисен ертÿçисемпе канашлу ирттернĕ.
Канашлу пуçланас умĕн районти шкулсен аслă класĕсенче 14 вĕренекен «Ĕçе тата оборонăна хатĕр» ?ГТО/ Пĕтĕм Раççейри физкультурăпа спорт комплексĕн удостоверенийĕсене илчĕ. Вĕсем хăйсен ÿсĕмĕсенче ГТО нормативĕсен знакĕсене тивĕçнĕ. Вĕренÿ тата çамрăксен политикин пайĕн аслă методисчĕ Сергей Скворцов унăн тĕллевĕсемпе паллаштарчĕ. Çитес çул комплекс нормативĕсене пур ÿсĕмри çынсем те пама пултараççĕ. Вĕренекенсене ГТО знакĕсене панă май район администрацийĕн пуçлăхĕ районта массăллă спорта аталантарас енĕпе туса ирттерекен ĕçсем физкультурăпа тата спортпа туслашма, спортра çитĕнÿсем тума май панине, вĕсем комплексăн çĕнĕ нормативĕсене пурнăçласа çакăн çинчен ĕнентерекен ылтăн, кĕмĕл, пăхăр значоксем илекен пĕрремĕш çамрăксем пулнине палăртрĕ.
Кино тата Ĕç çыннин çулталăкне халалланă культурăпа кану мероприятийĕсем ирттерни тата вĕсене «Елчĕк ен» хаçат страницисенче мĕнле çутатни çинчен районти клуб системин директорĕ Валентина Портнова тата хаçатăн тĕп редакторĕ Николай Алексеев каласа пачĕç. Николай Миллин Кино тата Ĕç çыннин çулталăкĕнче палăртнă ĕçсене пурнăçланине пĕлтернипе пĕрлех, Экологи тата Амăшĕпе Ашшĕн çулталăкĕнче умра тăракан тĕллевсене асăнчĕ. Чăнах та, экологи ыйтăвĕсемпе, тирпей-илем кĕртессипе Елчĕк районĕ чылайранпа ăнăçлă ĕçлесе пырать. Çапах та, район администрацийĕн пуçлăхĕн шухăшĕпе, районăн, ял тăрăхĕсен çулталăкра яланлăха, çитес ăрусем валли юлакан ĕçсем туса ирттермелле. Вăл çавăн пекех ачасем хамăра хисеплеччĕр, сума суччăр тесен çак ĕçе хамăртан пуçламаллине, ватă аттепе аннене хисеплемеллине, вĕсен пурнăçĕпе интересленмеллине, тимлĕх уйăрмаллине палăртрĕ.
Выльăх-чĕрлĕх чирĕсене хирĕç кĕрешекен районти ветеринари станцийĕн начальникĕ Ирина Николаева каланă тăрăх, республикăра Африка чумине Улатăр тата Пăрачкав районĕсенче виçĕ вырăнта тупса палăртнă. Чир саракансем кашнинче хир сыснисем пулнă. Çавăнпа сунарçăсен тытнă хир сыснисене пĕр вырăнта пусмалла, какайне ветстанцире тĕрĕслеттермелле. Чиртен сыхланса фермăсенче, вĕсен çывăхĕнче сыхлану ĕçĕсене тата профилактика мероприятийĕсене çирĕп пурнăçламалла.
Полицин Елчĕк районĕнчи пайĕн начальникĕн çумĕн тивĕçĕсене пурнăçласа пыракан Алексей Алексеев право йĕркисене сыхлакан органăн кăçалхи 11 уйăхри ĕçĕ-хĕлĕпе паллаштарчĕ.