21 декабря 2016 г.
Декабрĕн 15-16-мĕшĕсенче Раççей Президенчĕ В.Путин ĕçлĕ визитпа Японире пулнă. Делегаци йышĕнче Чăваш Республикин Пуçлăхĕ М.Игнатьев «Раççей-Япони бизнес-диалогĕ» ятпа ирттернĕ форум ĕçне хутшăннă.
Форумра М.Игнатьев Чăваш Енĕн инвестици илĕртÿлĕхĕн, экономика аталанăвĕн ĕç кăтартăвĕ çинчен хатĕрленĕ презентаципе паллаштарнă.
Чăваш Ен Пуçлăхĕ М.Игнатьев хăйĕн сăмахĕнче регионта бизнеса аталантарма йĕркеленĕ кирлĕ пек условисем пулни ют çĕршывсенчен инвесторсене явăçтарма питĕ меллĕ, пысăк пĕлтерĕшлĕ проектсене пурнăçа кĕртсе пыма лайăх пулнине палăртнă. Республикăпа ăнăçлă ĕçлес паха опыт Япони компанийĕсен пуррине асăннă. Çакна 2015 çулхи октябрь уйăхĕнче Шупашкарта Раççейри пĕртен-пĕр завод - автомобиль жгут кабелĕсем хатĕрлекен «Фуджикура» компанин производстви çирĕплетет.
«Автопромри икĕ енлĕ килĕшÿсем сарăлсах пыраççĕ. Чăваш Енпе Ульяновск облаçĕнче автомобиль пайĕсем туса кăларакан виçĕ завод хута кайрĕ».
Раççей Президенчĕ В.Путин «Раççей-Япони бизнес-диалогĕ» форум хыççăн ирттернĕ пресс-конференцире каланинчен.
Чăваш Енпе электротехника оборудованийĕсемпе малта пыракан производительсем те кăсăкланаççĕ. Японие каяс умĕн пĕр кун малтан М.Игнатьев «Сименс» компанипе «ВНИИР» килĕшĕве алă пуснă çĕре хутшăннă. Çитес çулта Чăваш Енĕн тĕп хулинче пысăк производство хута кайĕ.
Чăваш Республикин Пуçлăхĕ М.Игнатьев тĕрлĕ тĕлпулусем ирттернĕ. Hitachi компанин Мускаври представительствин директорĕпе Цугэ Тосиюкипе тĕл пулнă. Калаçу вăхăтĕнче Чăваш Республикине 2017 çул пуçламăшĕнче ĕçлĕ çулçÿревпе килсе каясси пирки калаçса татăлнă. Çавăн пекех М.Игнатьев Японире JFE Engineering Corporation компани представителĕсемпе те тĕл пулнă, Чăваш Енре теплица комплексĕсене хута ярас ыйтăва çĕкленĕ, строительство ĕçĕ пирки ыйтăва сÿтсе явнă.
/ЧР влаç органĕсен официаллă порталĕнчен/.