Публикации » Татьяна Акимовăна халĕ пĕтĕм тĕнче пĕлет

21 декабря 2016 г.

Декабрĕн 16-мĕшĕнче биатлон енĕпе Чехире иртекен Тĕнче кубокĕн виççĕмĕш этапĕнче пирĕн республикăран кайнă Татьяна Акимова биатлонистка 7,5 çухрăмлă дистанцие пĕрремĕш вĕçленĕ, винтовкăран пĕр йăнăшсăр пенĕ. Ку çĕнтерÿ биатлонисткăшăн кăна мар, Чăваш Республикинчи спортсменсемшĕн те пĕрремĕш çĕнтерÿ пулнă. «Хама хам та ĕненместĕп... Тренер дистанцире эпĕ иккĕмĕш пыни çинчен каларĕ те тĕлĕнсех кайрăм, хăвăртлăха тата ÿстертĕм», - тенĕ Т.Акимова корреспондентсене.

Шăматкун биатлонисткăсем пĕр-пĕрне хăваласа çитмелли чупура тупăшнă. Т.Акимова дистанцие пĕрремĕш кайнă. Винтовкăран пенĕ чухне вăл пĕр хутчен çеç мишене тĕл лектереймен. Ку хутĕнче пирĕн спортсменка финиша виççĕмĕш çитнĕ.

Икĕ дистанцире палăрнă Татьяна Акимовăна халĕ пĕтĕм тĕнче пĕлет. Эпир, телевизор умĕнче ларакансем, Таня çитĕнĕвĕсемпе савăнтăмăр, хамăр республикăшăн мăнаçлантăмăр.

Хаклав

Леонид КОШКИН, Çирĕклĕ Шăхаль ял тăрăхĕн пуçлăхĕ:

- Татьяна Акимова иртнĕ çул тĕнчери чи вăйлă биатлонистсем хушшинче ăмăртма пуçларĕ. Тÿрех элитăна кĕнĕ чи çĕнĕ спортсмен ята тивĕçрĕ. Анчах кăçал эпир унран пысăкрах çитĕнÿсем кĕтрĕмĕр. Çĕнĕ Лапсарта çуралса ÿснĕ чăваш хĕрĕ тинех иртнĕ эрнере пире савăнтармаллипе савăнтарчĕ. Умлă-хыçлă ылтăн тата пăхăр медальсем çĕнсе илчĕ.

Çак çитĕнÿре республика ертÿçисен тÿпи те пурах. Юлашки çулсенче Чăваш Енре Пăр керменĕ, биатлон, маунтинбайк  центрĕсем хута ячĕç. Спортăн çак енĕсемпе спорт ăсталăх ÿстерекен шкулсем чылайранпа ĕçлеççĕ.

Михаил СКВОРЦОВ, Кĕçĕн Таяпари тĕп шкулти физкультура учителĕ:

- Пирĕн республикăра спортăн тĕрлĕ тĕсĕсемпе Олимп, тĕнче, Европа чемпионĕсем, призерĕсем чылай. Анчах 1972 çулта Саппоро хулинче иртнĕ Хĕллехи Олимп вăййисенче Владимир Воронков йĕлтĕрçĕ çĕнтернĕренпе чăваш спортсменĕсем пысăк çитĕнÿсем тăвайманччĕ. Пирĕн пата та савăнăç çитрĕ: Татьяна Акимова Тĕнче кубокĕн виççĕмĕш тапхăрĕнче икĕ дистанцире ылтăн тата пăхăр медальсем çĕнсе илсе пирте, республика çыннисенче, савăнăç туйăмĕ çуратрĕ.

Çак çитĕнĕве Татьяна Акимова чăтăмлăхĕпе, дистанцире тар тăкса тунă. Чăваш биатлонистки малашне те пире пысăк çитĕнÿсемпе савăнтарасса шанса тăратпăр.

Николай АЛЕКСЕЕВ.