21 декабря 2016 г.
«Комбайн» ялхуçалăх производство кооперативĕнче 2017 çулхи ака ĕçĕсене пурнăçлама хатĕрленеççĕ.
Механизаторсем çуракине хутшăнакан ялхуçалăх техникине юсаççĕ. Хĕрÿ ĕççи вăхăтĕнче чи яваплă ĕçсене хутшăнакан Владимир Анисимовпа Николай Кожевников тата Николай Смирнов халĕ те хăйсен шанăçне тивĕçлипе тÿрре кăлараççĕ. Хĕрарăмсен ушкăнĕ ялхуçалăх культурисен вăрлăхĕсене алласа тасатассипе тимлет. Çак ĕçе икĕ звенопа йĕркеленĕ.
Минераллă удобренипе те саппасланма тытăннă ĕнтĕ. Хальлĕхе ăна 60 тонна кÿрсе килнĕ. Çĕнĕ вăрлăхсемпе кашни çул анлăн усă куракан ялхуçалăх предприятийĕнче черетлĕ çураки валли тĕш тырă культурисен оригиналлă вăрлăхĕсене 20 тоннăран кая мар туянма палăртаççĕ.
Халĕ ĕнтĕ тинех ялхуçалăх предприятийĕ Çĕнĕ çула ĕçри çитĕнÿсемпе кĕтсе илнине те çирĕплетсех калама пулĕ. Кунти фермăсенче 939 пуç мăйракаллă шултăра выльăх, çав шутран сăвăнакан 350 ĕне шутланать. Отчетлă 11 уйăхри тапхăрта пĕтĕмпе 1459 центнер аш-какай, 21049 центнер сĕт туса илнĕ. Пĕр ĕнерен вăтамран 5035 килограмм сĕт сунă.
Пурлăхпа техника никĕсне çулран-çул çирĕплетсе пыракан ялхуçалăх предприятийĕнче 2017 çулта пурнăçламалли ĕçсен калăпăшĕ те пĕчĕк мар. Тĕп ĕç фермăсене реконструкци тăвасси тесе палăртнă.