21 декабря 2016 г.
Раççей Пенси фончĕн тĕп тивĕçĕсенчен пĕри - пенси тата ытти социаллă тÿлевсене палăртасси тата тÿлесе тăрасси.
Раççей Пенси фончĕн Елчĕк районĕнчи пайĕ тĕп тивĕçе пурнăçласа 2016 çулта 1420 пенсипе социаллă тÿлевсене палăртнă. Кăçалхи февралĕн 1-мĕшĕнче ĕçлемен пенсионерсен страховани пенсине 4 процент индексланă. Ун хыççăн тÿлевĕн çирĕплетнĕ виçи 4558,93 тенкĕпе, пенси балĕ 74,27 тенкĕпе танлашнă.
Районти страховани пенсине илекенсенчен 89 проценчĕ ĕçлемест. Февралĕн 1-мĕшĕнчен 6782 пенсионерăн пенси виçи вăтамран 430 тенкĕ ÿсрĕ, 11160,58 тенкĕпе танлашрĕ. Çак пенсионерăн пурăнмалли чи пĕчĕк виçинчен /6677 тенкĕ/ 1,67 хут ытларах. Ĕçлекен пенсионерсен страховани пенсине августăн 1-мĕшĕнчен ÿстернĕ - 1225 пенсионерăн пенси виçи вăтамран 121,40 тенкĕ пысăкланчĕ. Енчен те пенсионер ĕçрен кайма шутлать пулсан, унăн пенсине заявлени памасăрах индекслаççĕ. Кăçалхи март уйăхĕнчен пуçласа çак правăпа 334 пенсионер усă курчĕ.
2016 çулхи апрелĕн 1-мĕшĕнчен социаллă пенси виçи те, пенсионер ĕçленине пăхмасăр, 4 процент ÿснĕ. 576 пенсионер çакăнпа усă курчĕ - социаллă пенсин вăтам виçи 7266,48 тенкĕпе, инвалид ачасен, ачаранах I ушкăнри инвалидсен пенсийĕ вăтамран 11903,51 тенкĕпе танлашрĕ.
Районти 1700 çын пухăнакан пенсин патшалăх софинансированийĕн программине хутшăнать. Кăçал çеç 1890 çын тĕрлĕ майпа пухăннă пенсине тÿрех илме пултарчĕ. Çак тĕллевпе 49 миллион тенкĕ тăкакланă.
Пенси фончĕн Елчĕк районĕнчи пайĕ федераци çăмăллăхçисене социаллă пулăшу пуххине тÿлессипе те малалла ĕçлет. Соцпакет хальхи вăхăтра 995,23 тенкĕпе танлашать, 3 пайран - эмел, санаторипе курорт, транспорт тăкакĕсенчен тăрать.
Районти 2296 çын, çав шутран 78 проценчĕ - инвалидсем, федераци çăмăлăхçисем шутланаççĕ. Вĕсем уйăхсерен илекен тÿлев вăтамран 110 тенкĕ ÿсрĕ, 2152 тенкĕпе танлашрĕ. Аттелĕхĕн Аслă вăрçин участникĕсемпе инваличĕсем, çар тытăçăвĕсене хутшăннă ветерансемпе вĕсен тăлăх арăмĕсем, радиаци катастрофисене пĕтерме хутшăннисем тата ытти хăш-пĕр категорири çынсем маларах асăннă суммăна алла илеççĕ.
Хăш-пĕр ватă çынсем илекен пенси виçи регионти пенсионерсен пурăнмалли пĕчĕк виçерен /Чăваш Республикинче вăл 7391 тенкĕ/ сахал пулсан, вĕсене пенси çумне хушса тÿлеççĕ. Çакăнпа 765 пенсионер усă курать.
Çулталăк пуçланнăранпа районта пенсисемпе социаллă тÿлевсене тÿлеме Пенси фончĕн бюджетĕнчен 982 миллион тенкĕ укçа янă. Çавăн пекех амăшĕн капиталне тÿлеме 33 миллион тенкĕ тăкакланă.
Амăшĕн капиталĕн сертификатне кăçал районти 86 çемьене, программа ĕçлеме пуçланăранпа 1190 çемьене панă. 2009 çултанпа унпа 698 çемье 264,7 миллион тенкĕлĕх усă курнă. Амăшĕн капиталĕн ытларах пайĕ ?96 процент/ пурăнмалли условисене лайăхлатма, 4 проценчĕ ачасене тÿлевлĕ вĕрентме янă.
Раççей Пенси фончĕ пурнăç уттипе тан утма тăрăшать. Вăл паракан пулăшусене электрон мелĕпе интернет урлă es.pfrf.ru адреспа илме май пур.
Çавăн пекех Раççей Пенси фончĕн Елчĕк районĕнчи пайĕнче клиент служби йĕркеленĕ. Вăл çулсерен 12 пин ытла çынна йышăнать. Унсăр пуçне район центрĕнчен инçетре вырнаçнă ялсене тухса çынсене йышăнассине те йĕркеленĕ.
Çынсем пирĕнтен тимлĕх кĕтеççĕ. Раççей Пенси фончĕн Елчĕк районĕнчи пайĕнче сотрудниксен туслă та çирĕп, хăйсен ĕçне ăста пĕлекен команди чăмăртаннă. М.Маркова, Л.Кучкова, Н.Питакова, Т.Агеева, Е.Львова, Н.Амасева, М.Воронцова тивĕçсене туллин пурнăçлаççĕ.
Декабрĕн 22-мĕшĕнче Раççей Пенси фондне йĕркеленĕренпе 26 çул çитет. Çавăнпа ĕçтешсене хăйсене шанса панă ĕçе çÿллĕ шайра пурнăçласа пынишĕн, клиентсемпе тимлĕ пулнăшăн, пулăшма тăрăшнăшăн тав тăватăп. Çирĕп сывлăхлă пулăр!
З.ЯКОВЛЕВА,
Раççей Пенси фончĕн Елчĕк районĕнчи пайĕн ертÿçи.