21 декабря 2016 г.
Тунтикун район администрацийĕн пуçлăхĕ Н.Миллин ертсе пынипе терроризма хирĕç кĕрешекен районти комиссин черетлĕ ларăвĕ иртнĕ.
Ларура пурăнмалли çуртсемпе коммуналлă хуçалăхăн тата топливăпа энергетика комплексĕн объекчĕсене террорла актсенчен хÿтĕлесси, Çĕнĕ çул тата Раштав уявĕсене ирттернĕ вăхăтра хăрушсăрлăх йĕркисемпе тивĕçтересси тата Аслă Пăла Тимеш ял тăрăхĕнчи терроризма хирĕç кĕрешекен комиссин ĕç-хĕлне тишкересси тĕп вырăнта пулнă.
Асăннă ыйтусемпе йышăнусем тунă. Акă, пурăнмалли çуртсемпе коммуналлă хуçалăхăн, газпа тата электроэнергипе тивĕçтерекен предприятисен ертÿçисене тавралăха сăнаса тăма, инкексем, терроризм хăрушлăхĕ сиксе тухсан, вĕсене пĕтермелли мерăсене палăртма, çак тĕллевпе вырăнти хăйтытăмлăх органĕсемпе тачă çыхăнса ĕçлеме, объектсен хăрушсăрлăхĕн паспорчĕсене çĕнетме сĕннĕ. Çавăн пекех Çĕнĕ çул, Раштав уявĕсене ирттернĕ вăхăтра общество йĕркелĕхне тивĕçлипе йĕркелемелле, инструктажсем ирттермелле, çынсен тимлĕхне ÿстерессипе информаципе пропаганда ĕçне вăйлатмалла.
Ял тăрăхĕнче вырнаçнă культура, суту-илÿ тата ытти объектсенче видеосăнав камерисене, полицине чĕнсе илмелли кнопкăсене вырнаçтарассипе малалла ĕçлемелле, экстремизма хирĕç кĕрешмелли, çамрăксемпе профилактикăпа воспитани ĕçĕсене вăйлатмалли мероприятисене те палăртмалла.