21 декабря 2016 г.
Шăпах 30 çул каялла, 1986 çулхи декабрь уйăхĕнче, Пĕтĕм Союзри вăрçăпа ĕç ветеранĕсен организацийĕн йышĕнче Пĕтĕм Раççейри ветерансен организацийĕ йĕркеленнĕ. 1991 çулхи ноябрĕн 27-мĕшĕнчен вăл - Пĕтĕм Раççейри вăрçăпа ĕç, хĕç-пăшаллă вăйсен, право сыхлавĕн органĕсен ветеранĕсен общество организацийĕ.
Пĕтĕм Раççейри общество организацийĕн районти канашĕ ялсенчи пуçламăш 39 организацие, вĕсен йышĕнче 7592 ветеран, пĕрлештерсе тăрать. Ĕç-хĕле йĕркелесе пыма яланхи 6 комисси йĕркеленĕ. Вĕсем ветерансене тĕрлĕрен хÿтлĕх, пулăшу парассипе тимлеççĕ. Çак тĕллевпе ветерансен районти канашĕ район тата ял тăрăхĕсен администрацийĕсемпе, халăха социаллă пулăшу паракан органсемпе, медицина, вĕренÿ, культура учрежденийĕсемпе, Раççей Пенси фончĕн районти пайĕпе тачă çыхăну тытать. Вĕсен представителĕсем канашăн пленумĕсенче, президиум ларăвĕсенче тухса калаçаççĕ, ветерансем мĕнле пулăшусем илме пултарнине ăнлантараççĕ.
Район центрĕнчен инçетре вырнаçнă ялсенче 1070 ытла ватă çын пурăнать. Вĕсем патне социаллă хÿтлĕх, сывлăх сыхлавĕн, пенсипе тивĕçтерекен, культура учрежденийĕсен сотрудникĕсенчен йĕркеленĕ ятарлă информаципе консультаци бригади график тăрăх тухса çÿрет. Лаш Таяпари тата Çирĕклĕ Шăхалĕнчи Ваттисен çурчĕсенче хÿтлĕх тупнă 31 ватă, çавăн пекех ытти чылай ветерана çамрăксен тимлĕхĕ кирлĕ.
Вăрçă ветеранĕсене пурăнмалли çуртсемпе, хваттерсемпе тивĕçтересси районта лайăх пырать - 135 ветеран хваттерлĕ пулнă, Çирĕклĕ Шăхалĕнчи Л.Архиповăна çурт хăпартса панă.
Кăçал çеç 26 çын «Ĕç ветеранĕ», 91 çын «Чăваш Республикин ĕç ветеранĕ» ятсене тивĕçнĕ.
Çулсем иртнĕçемĕн çын ватăлать, унăн сывлăхĕ те хавшать. Çавăнпа медицина ĕçченĕсем ветерансен сывлăхне тимлесех тăраççĕ. Кăçал çеç тĕрĕслев витĕр ватă 1262 çын, диспансеризаци витĕр 966 ветеран тухнă.
Сывлăха çирĕплетес тĕллевпе медицина учрежденийĕсене 134 ветерана, госпитале 4 ветерана янă. Районти тĕп больницăн терапи, хирурги уйрăмĕсенче Аттелĕхĕн Аслă вăрçин тата тыл ветеранĕсене сипленме ятарлă 3 палата уçнă.
Ветерансене эмелсемпе тивĕçтересси те ăнăçлă пырать. Пĕччен пурăнакан тата вырăнпа выртса тăракан 240 çынна эмелсене киле пырса парассине йĕркеленĕ.
Сывă пурнăç йĕркине тытса пырассинче тĕрлĕ пĕрлешÿсем пысăк пулăшу параççĕ. Районти тĕп библиотекăри А.Сайкина ертсе пыракан «Çын тата çутçанталăк» клуб, врачпа уçăлса çÿрени, Скандинави мелĕпе утни питĕ кирлине ăнланаççĕ ветерансем.
Ватăсем хăйсем те обществăлла ĕçсенчен айккине юлмаççĕ: çитĕнекен ăрăва патриотла воспитани парасси - тĕп вырăнта. Вĕренÿ, культурăпа спорт учрежденийĕсенче час-часах курма пулать вĕсене: вĕренекенсемпе, çамрăксемпе тĕлпулусем ирттереççĕ, музейсем валли тĕрлĕ материалсем пухма пулăшаççĕ.
«Паян пирĕн ветерансен пурнăç опычĕ, тĕплĕн шухăшласа йышăнусем тума пĕлни, принциплăхĕ тата тÿрĕ кăмăллăхĕ питех те кирлĕ. Шăпах çавăнпа 2015 çулта Чăваш Ен Пуçлăхĕ çумĕнче Ваттисен канашне туса хутăмăр. Унăн ĕçĕ-хĕлĕ Чăваш Республикин экономика, общество тата культура пурнăçĕнче ĕç ветеранĕсен витĕмне ÿстерме пулăшасса шанса тăратăп».
Чăваш Ен Пуçлăхĕ Михаил Игнатьев Чăваш Республикин Патшалăх Канашне янă Çыруран.
Çамрăксем те ветерансене манса каймаççĕ, май килнĕ таран пулăшаççĕ. Шкулсенчи 1385 вĕренекене пĕрлештерсе тăракан ирĕклĕ командăсем, волонтерсем Аттелĕхĕн Аслă вăрçин, тыл ветеранĕсене, Ваттисен çурчĕсенче пурăнакансене тĕрлĕ енлĕ пулăшаççĕ: вут-шанкă касса-çурса параççĕ, кил-çурта тирпейлеççĕ, кил картипе çурт умне юртан тасатаççĕ, лавккаран апат-çимĕç илсе килсе параççĕ. Çавăн пекех ялсенчи палăксемпе монументсене, обелисксене, асăну хăмисене йĕркеллĕ тытса тăрассипе тимлеççĕ.
Ветерансем çитĕнекен ăру валли аса илÿ-сем хăварма тăрăшаççĕ - юлашки çулсенче çеç вĕсем 22 кĕнекене кун çути кăтартнă.
Ветерансем канма та пĕлеççĕ. Вĕсем культурăллă-массăллă мероприятисене активлă хутшăнаççĕ, тĕрлĕ ансамбльсемпе клубсем, кружоксем йĕркелеççĕ. Елчĕкри «Туслăх» тата «Шуçăм», Тăрăмри «Алмантай», Лаш Таяпари «Тайпи», Тÿскелти «Шуçăм», Яманчÿрелĕнчи «Эткер» фольклор ансамблĕсем, Патреккелĕнчи халăх хорĕ тата районта çеç мар, республикăра, ун тулашăнче те палăрнă.
Районти культурăпа кану учрежденийĕсенче 185 ветерана пĕрлештерсе тăракан пĕрлешÿсемпе кружоксем ĕçлеççĕ.
Ветерансем хăйсен паха опытне çитĕнекен ăрăва парас енĕпе те тимлеççĕ. Ачасемпе ирттерекен кружоксенче халăхăн ĕлĕкрен пыракан йăли-йĕркисене - тĕрлесси, пир тĕртесси, йывăçран тĕрлĕ япаласем касса кăларасси, хăваран карçинккасем çыхасси тата ытти те - сыхласа хăварассипе Н.Захарова, Г.Щипцова, В.Вастулова, С.Голубева, Е.Шуркина, М.Юсупов, Н.Печкова, Б.Пятаков ветерансем пысăк пулăшу параççĕ.
Пĕтĕм Раççейри вăрçăпа ĕç, хĕç-пăшаллă вăйсен, право сыхлавĕн органĕсен районти канашĕн ĕçĕ тĕрлĕ енлĕ. Çакна çеç калама пулать: ветерансем пурнăç таппинчен юлмаççĕ, малаллах шанчăклăн утаççĕ.
С.ТЕРЕНТЬЕВА,
вăрçăпа ĕç, хĕç-пăшаллă вăйсен, право сыхлавĕн органĕсен ветеранĕсен районти канашĕн председателĕ.