17 декабря 2016 г.
Çĕнтерÿçĕсен йышĕнче
Чăваш Республикин Информаци политикин тата массăллă коммуникацисен министерстви «2016 çул - Чăваш Енри Ĕç çыннин çулталăкĕ» темăна анлă уçса паракан журналистсем, массăллă информаци хатĕрĕсем хушшинче конкурс ирттерчĕ. Çак кунсенче ăна пĕтĕмлетнĕ.
Конкурса пурĕ 108 ĕç тăратнă. Уйрăмах вĕсен йышĕ районсенчи хаçатсенчен ытларах пулнă.
«Массăллă информацин районсенчи /хуласенчи/ пичет хатĕрĕсем» номинацире пирĕн ĕçтешĕмĕр, «Елчĕк ен» хаçатăн çырусен пайĕн редакторĕ Валентина Кириллова иккĕмĕш вырăн йышăннă. Конкурс комиссийĕ вăл хатĕрленĕ «Ĕçлеме пĕлекен – йывăрлăха çĕнтерекен» материала лайăх хак панă.
Çĕнтерÿçĕне Дипломпа çитес çулхи январь уйăхĕнче Пичет кунне халалланă савăнăçлă уявра чыслĕç.
Сăмах май, Валентина Кириллова кăçал Раççей МЧСĕн Чăваш Республикинчи Тĕп управленийĕ йĕркеленĕ «Вут-çулăмлă перо» конкурсра та çĕнтерÿçĕ ятне тивĕçнĕ.
Ĕçтешĕмĕре чунтан саламлатпăр, малашне те ăнăçу сунатпăр.
А.КАРЛИН.
«Кино кунĕ» акци иртет
Раштав уйăхĕн 19-мĕшĕнче Раççейре Кино тата Чăваш Республикинчи Ĕç çыннин çулталăкне халалласа республикăра пуçласа «Кино кунĕ» акци старт илет.
Мероприяти йĕркелÿçисем - ЧР Культура, национальноçсен ĕçĕсен тата архив ĕçĕн, Ĕçлев тата социаллă хÿтлĕх министерствисем тата вырăнти хăйтытăмлăх органĕсем.
«Кино кунĕнче» республикăри районсемпе хуласенче 170 ытла площадка - кинотеатрсем, культура çурчĕсем, библиотекăсем, музейсем - ĕçлеççĕ. Вĕсенче «Вовочка» /0+/, «Девчата» /0+/, «Охрана» /16+/ илемлĕ фильмсен тÿлевсĕр сеансĕсем иртеççĕ.
Мероприятисен планĕнче - концертсем, куравсем, конкурссемпе викторинăсем.
Республикăра пурăнакансене пурне те «Кино кунĕ» акцие йыхравлатпăр.
Декабрĕн 21-мĕшĕнче - Пĕрлехи информаци кунĕ
Декабрĕн 21-мĕшĕнче Чăваш Енре, çавăн пекех пирĕн районта та, Пĕрлехи информаци кунĕ иртет.
Пĕрлехи информаци кунĕн тĕп теми - Раççей Федерацийĕн Президенчĕ В.В.Путин Раççей Федераци Пухăвне 2017 çул валли янă Çырăва тишкересси. Çавăн пекех çак кун Чăваш Республикин Пуçлăхĕн 2016 çулхи ноябрĕн 23-мĕшĕнчи 174-мĕш номерлĕ «Чăваш Республикинче 2017 çула Амăшĕпе Ашшĕн çулталăкĕ тесе пĕлтересси çинчен» указне пурнăçа кĕртессипе, пахалăхсăр алкоголь тата спиртлă шĕвексен çулне пÿлессипе, Çĕнĕ çул тата Раштав уявĕсем вăхăтĕнче, 2016-2017 çулсенчи хĕллехи тапхăрта пушар хăрушсăрлăхĕн йĕркисене пăхăнассипе çыхăннă ыйтусене те тишкерĕç.
Пĕрлехи информаци кунĕнче ушкăнсем ял тăрăхĕсенче, предприятисемпе организацисенче пулаççĕ, çынсене хăйсен ыйтăвĕсемпе йышăнаççĕ.