14 декабря 2016 г.
Чăваш Республикин Общество палати хальхи вăхăтра граждан обществин пĕлтерĕшĕ ÿссех пынине шута илсе коммерциллĕ мар организацисен II форумне ирттернĕ.
Унта Общество палатин членĕсем, çĕнĕ проектсене аталантарас енĕпе ĕçлекен стратеги пуçарăвĕсен агентствин эксперчĕсем, коммерциллĕ мар организацисен, ĕç тăвакан влаç тата вырăнти хăйтытăмлăх органĕсен, бизнес представителĕсем хутшăннă.
- Ку форум Общество палатипе республикăри коммерциллĕ мар организацисемшĕн çеç мар, пĕтĕм общественноçшăн пĕлтерĕшлĕ пулăм. Пирĕн калаçмалли, сÿтсе явмалли сахал мар. Палатăна йĕркеленĕренпе кăçал 5 çул çитрĕ, çавна май хăш-пĕр кăтартăва пĕтĕмлетме вăхăт, - тенĕ Общество палатин председателĕ Алексей Судленков.
Халĕ республикăра коммерциллĕ мар 1378 организаци шутланать: общество тата тĕн пĕрлешĕвĕсем, профсоюз, политика партийĕсен уйрăмĕсем. Кунсăр пуçне 16 национальноçа пĕрлештерекен культурăпа национальноçсен 34 пĕрлешĕвĕ ĕçлет.
Общество палати халĕ координаци ĕçĕ-хĕлĕн тĕп органĕ шутланать. 2016 çулта Чăваш Ен Пуçлăхĕн указĕпе килĕшÿллĕн, гражданла общество палатин членĕсем 21 çынран пуçласа 33-е çитнĕ. Çакă та республикăн социаллă пурнăçĕпе экономика ыйтăвĕсене çийĕнчех татса пама май парать.
Форум икĕ тапхăрпа иртнĕ. Коммерциллĕ мар организацисен 300 ытла представителĕ пĕрремĕш кунĕнче «Пуласлăхри Чăваш Ен: 2030 çулчченхи аталану стратегийĕ» форсайт-сессине, иккĕмĕшĕнче «çавра сĕтелсене» хутшăннă, тĕрлĕ экспозицисемпе паллашнă.
- Эпир гражданла обществăн пĕрлĕхлĕ институчĕсене йĕркелес тĕлĕшпе пысăк ĕç туса ирттеретпĕр, - тенĕ форумра Чăваш Ен Пуçлăхĕ Михаил Игнатьев. - Халăхпа пĕр чĕлхе тупрăмăр, çынсен шухăш-кăмăлне шута илме тăрăшрăмăр. Çакă та нумай ыйтăва татса пама май пачĕ.
Çавăн пекех Михаил Васильевич Раççей Федерацийĕн Президенчĕ Владимир Путин Федераци Пухăвне янă Çырура коммерциллĕ мар организацисен ĕçĕ пысăк пĕлтерĕшлĕ пулнине палăртса каланине аса илтернĕ.
Светлана ГОЛУБЕВА, Елчĕкри историпе тăван тавралăх музейĕн заведующийĕ:
- Форумра эпир Курнавăш ял тăрăхĕн пуçлăхĕпе, районти ашшĕсен канашĕн ертÿçипе Юрий Смирновпа «Экологи вĕренĕвĕ тата общество экологи тĕрĕслевĕ» «çавра сĕтеле» хутшăнтăмăр. Тăван тавралăха тирпей-илем кĕртесси, хамăр пурăнакан вырăна çÿп-çапран тасатасси никамран та мар, хамăртан килет. Çавна май кашнийĕн тирпейлĕ те чыслă пулмалла, тавралăха симĕслентерсе йывăçсем лартмалла, вĕсене пăхса ÿстермелле.
Ирина АНИКИНА, халăха социаллă хÿтлĕх паракан пай ертÿçи:
- Чăваш Республикин Общество палатин ертÿçи форумра усăллă сĕнÿсем нумай пачĕ. Вĕсем районти коммерциллĕ мар организацисене çĕнĕлле ĕçлеме май парасса шанас килет. Пĕр-пĕринпе калаçмасăр, хутшăнмасăр пуласлăха палăртма май çук, çавăнпа та районта та аталану проекчĕсене ĕçе кĕртме тăрăшма майсем тупни кирлĕ.