14 декабря 2016 г.
Декабрĕн 12-мĕшĕнче, Раççей Федерацийĕн Конституцийĕн кунĕнче, Пĕтĕм Раççейре çынсене хăйсен ыйтăвĕсемпе йышăнмалли кун иртнĕ.
Районта пурăнакансене 12 сехетрен пуçласа 20 сехетчен район администрацийĕн пуçлăхĕ Николай Миллин, ял тăрăхĕсен пуçлăхĕсем, Раççей Пенси фончĕн Елчĕк районĕнчи пайĕн, РФ ШĔМĕн муниципалитетсем хушшинчи «Комсомольский» уйрăмĕн полицин Елчĕк районĕнчи пайĕн миграци пункчĕн специалисчĕсем йышăннă.
Çынсене ытларах нумай ачаллă çемьесене тÿлевсĕр çĕр лаптăкĕ уйăрса парас, пенсионерсене пĕр хутчен паракан 5 пин тенкĕ тÿлевпе тивĕçтерес, ялсенчи урамсене хĕллехи вăхăтра юртан тасатса тăрас, çĕрле электрохунарсене çутас, автоçулсене юсаса çĕнетес тата ытти ыйтусем интереслентернĕ.
Пĕтĕм Раççейри йышăну кунĕнче районти 66 çын хăйне хумхантаракан ыйтусемпе тивĕçлĕ хурав илнĕ.