14 декабря 2016 г.
Тÿскел ялĕнче çуралса ÿснĕ, Афган вăрçин ветеранĕ, хальхи вăхăтра Шупашкарта пурăнакан Владимир Николаевич Яковлевăн пархатарлă та сăваплă ĕçне республикăра пурăнакансем тивĕçлипе хаклаççĕ.
Çирĕп кăмăллă та ырă чун-чĕреллĕ çак çын вĕри точкăсенче служба тивĕçне чыслăн пурнăçланă ветерансен Чăваш Республикинчи «Доблесть» общество организацине вăл йĕркеленнĕ вăхăтран тытăнсах ертсе пырать. Правительство йышне кĕмен коммерциллĕ мар асăннă организаци йывăрлăхпа тĕл пулнă çар çыннисемпе вĕсен çемйисене, инвалид ачасене пулăшассипе тимлет. Владимир Николаевич «Доблесть» организацин ĕçне ентешĕсене - Елчĕк районĕн теветкеллĕ, хастар çыннисене те явăçтарнă. Хăй тахçантанпах лайăх пĕлекен-паллакан юлташĕсемпе çума-çумăн вăй хунăран çивĕч ыйтусене татса пама та çăмăлрах пулнине çирĕплетет вăл. Владимир Яковлевăн çемйи те пархатарлă ĕçрен пăрăнмасть. Антонина мăшăрĕпе Екатерина хĕрĕ те çак çулсем тăршĕпех унпа юнашар, вĕсем ăна кулленхи ĕçре нумай пулăшаççĕ. «Доблесть» «Сахал тупăш илекенсене тата вăрçă ветеранĕсен çемйисене гуманитари пулăшăвĕ парассин программи» ятпа иртекен Раççей шайĕнчи конкурссене те çак çулсенче сахал мар хутшăннă, темиçе хутчен те грант çĕнсе илнĕ. Шанчăклă йышри çар ĕçĕн хастар ветеранĕсем пĕрлехи вăйпа республикăри хуласемпе районсене тăтăшах тухса çÿреççĕ, тĕрлĕрен мероприятисем йĕркелесе ирттереççĕ. Çар çыннисемпе тата вĕсен çемйисемпе, сусăр ачасемпе районти тĕп библиотекăра йĕркеленĕ çавра сĕтел хушшинчи ăшă тĕлпулăва пĕр хутчен анчах мар хутшăнма тÿр килнĕрен çакна ăнланса илетĕн: пурнăçри йывăрлăхсемпе тĕл пулнă çынсене мал ĕмĕтпе, шанчăкпа пурăнма та хавхалантараççĕ мар-и вĕсем? Пысăк уяв евĕрех иртнĕ юлашки тĕлпулу самантĕнче Владимир Яковлев Афганистанри тăнăç пурнăçшăн вилĕмпе юнашар тăрса кĕрешнĕ районти 300-е яхăн, Кавказ вăрçине хутшăнма шăпа пÿрнĕ салтаксен ячĕсем ĕмĕр манăçманнине, çавăн пекех вилĕм çави айне пулнă салтаксемпе вĕсен çемйисен умĕнче хăйсене ĕмĕр парăмлă пулнă пек туйнине палăртса каларĕ. «Ачисем йывăр чирпе асапланакан çемьесен нушине те ăнланатпăр. Вĕсене хамăр енчен май пур таран хавхалантарма, пулăшма тăрăшатпăр», - тени те чăн сăмах. Елчĕкре пурăнакан Семеновсем «Доблесть» организацин ертÿçине район хаçачĕ урлă тав сăмахĕ калас тĕллевпе ятарласа редакцие килни те асрах. Владимир Яковлев вĕсен мĕн пĕчĕкрен йывăр чирпе асапланакан Сережа ывăлне ятарлă йышши кÿме туянма, ăна Мускавранах кÿрсе килме пулăшнăшăн чĕререн тав тунине палăртрĕç.
...Çынна пулăшма, ырă тума ырă чун-чĕре кирлĕ...
Светлана АРХИПОВА.