14 декабря 2016 г.
Пурнăç тĕлĕнмелле хăвăртлăхпа аталанать. Ун сиккипе тан утма та çăмăл мар. Паян Интернетпа пĕтĕм тĕнче усă курать. Усси пысăк унăн, çапах «эрешмен картин» сиенлĕ енĕсем те сахал мар.
Çамрăксем, уйрăмах шкул ачисем, усăллă хыпарсемпе кăна усă курма вĕренсе çитеймен-ха. Раççейре 14 тултарман 10 миллион ача Интернетпа усă курать. Вĕсем социаллă тĕрлĕ сете кĕреççĕ, хăйсем çинчен мĕн те пулин пĕлтереççĕ. Çав вăхăтрах экран леш енче кам ларнине, вăл мĕнле шухăш-тĕллевлине пуçа та илмеççĕ. Çавна пулах 2012 çулта çĕршывра «Ачасене сывлăха тата аталанăва сиен кÿрекен информацирен хÿтĕлесси çинчен» федераци саккунĕ вăя кĕнĕ.
Çул çитмен ача-пăчана сиенлĕ информацирен аяккинче тăма хăнăхтарасси чи малтанах ашшĕ-амăшĕнчен, унтан вĕренÿ учрежденийĕсенчен килет. Хальхи вăхăтра ачасем телекурав е Интернет урлă информаци илме питĕ ир вĕренеççĕ. Тепĕр чухне вĕсем виртуаллă тĕнчери «геройĕсене» юлташĕсенчен те ытларах чунне уçса параççĕ. Интернет картин тыткăнне лекнисем чылай чухне хăйсене мĕн пăшăрхантарнине çывăх çыннисене те уçса памаççĕ. Вĕсен пĕртен-пĕр тусĕ социаллă сеть пулса тăрать. Ашшĕ-амăшĕ ывăл-хĕрне онлайнра чухне пĕрре те сăнаса лармасть. Çапла вара ача кирлĕ-кирлĕ мар сайтри материалсемпе паллашать. Сăмахран, 3-5 çулхи ачасем перекен, вĕлерекен, хăваласа тытакан вăйăсене выляççĕ. Çакă, паллах, ачасен психикине витĕм кÿретех. Шкула кайман ача компьютер умĕнче 20 минут ытла ларнин сиенĕ те пысăк. Çавăнпа та ашшĕ-амăшĕн ачисемпе ăс-тăна аталантаракан вăйăсем выляма тăрăшмалла, спортпа туслаштармалла. Хĕллехи кун урамра выляни епле усăллă тата! Пушă чухне пĕчĕккисемпе сĕтел хушшине юнашар ларса тĕрлĕ ал ĕçĕ тума хăнăхни те усăллă. Паян хамăр ачасене пăхса тăраймасан ăçта килсе тухăпăр. Кашни ашшĕ-амăшĕн пĕрремĕш тивĕçĕ - тĕпренчĕкĕмĕрсене этемлĕхе çавăрса илекен кирлĕ мар информацирен хÿтĕлесе ырăлăха, тĕрĕслĕхе вĕрентесси.
Л.САЙКИНА,
педагог-психолог.