14 декабря 2016 г.
Часах Çĕнĕ çулхи кану кунĕсем çитеççĕ. Çавăнпа ют çĕршыва кайса килес текен çынсем те пур. Анчах... «Ĕçлĕ» çынсем ют çĕршыва каймалли паспорт пирки питĕ кая юлса аса илеççĕ. Пуçланать вара хĕвĕшÿ... Çапах та, тен, нумайăшĕ пĕлмест те пулĕ, çак мелсĕр япаларан хăтăлма пулать - паспорта Раççей Федерацийĕн пулăшусем паракан официаллă порталĕ /адресĕ - www.gosuslugi.ru/ урлă та илме май пур.
Пĕрлехи порталпа усă курса килтен тухмасăрах, ĕç вырăнĕнчен, канупа уяв кунĕсенче, онлайн-режимпа ют çĕршыва каймалли паспорта парассине те йĕркеленĕ. Интернет тытăмĕпе усă курса заявлени памалла.
Чăваш Республикин Шалти ĕçсен министерствин миграци ыйтăвĕсемпе ĕçлекен управленийĕ декабрĕн 14-24-мĕшĕсенче «Патшалăх порталĕ урлă ют çĕршыва каймалли паспорта - кĕске вăхăтра» акци ирттерет. Çак акци вăхăтĕнче çул çитмен çамрăксен ют çĕршыва каймалли паспортне маларах çырăнмасăрах тата черетсĕрех 10 кунта, кивĕ йышшисене 3 кунта хатĕрлесе параççĕ.
Çавăн пекех ют çĕршыва каймалли паспорт илессине патшалăх тата муниципалитет пулăшăвĕсем паракан нумай функциллĕ центрта та йĕркеленĕ.
А.СОСНОВА.