14 декабря 2016 г.
Шкул ачисем хушшинче Пĕтĕм Раççейри предметсен олимпиадисен район шайĕнчи тупăшăвĕ ку эрнере вĕçленет.
Районти олимпиадăсем Г.Н.Волков ячĕллĕ Аслă Елчĕкри пĕтĕмĕшле пĕлÿ паракан вăтам шкулта иртеççĕ. Вĕренекенсем 20 предмета мĕнле пĕлнине шĕкĕлчеççĕ. Çавăн пекех тăван чĕлхене юратакансем йăлана кĕнĕ чăваш чĕлхипе тата литературипе, тутар чĕлхипе тата литературипе, тăван ен культурипе хăйсен ăсталăхне тĕрĕслеççĕ.
Муниципалитет шайĕнчи олимпиадăра чи пысăк кăтарту тунă ачасем республикăри олимпиадăна хутшăнаççĕ.
Регионти олимпиадăна хутшăнакансен кашни предметпа ятарласа çирĕплетнĕ балл пуçтармалла. Хальлĕхе астрономипе, нимĕç чĕлхипе, географипе, искусствăпа район чысне республикăра хÿтĕлекен вĕренекенсен списокне йĕркеленĕ. Акă, Çирĕклĕ Шăхалĕнчи Кирилл Чернов тăххăрмĕшсем хушшинче астрономи предмечĕпе чи нумай балл пухса çĕнтерÿçĕ пулса тăнă. Чи маттуррисем - Елчĕкри пĕтĕмĕшле пĕлÿ паракан вăтам шкулта пĕлÿ илекенсем. Екатерина Агеевăпа Артемий Филиппов - призерсем. Çавăн пекех Эмиля Петухова, Александр Иванов республикăри олимпиадăна хутшăнма тивĕçлĕ балл пуçтарнă. 10 класри Андрей Данилов, 11 класри Анна Данилова районти олимпиадăн призерĕпе çĕнтерÿçи. Вĕсем те район чысне республикăра хÿтĕлеме тивĕçнĕ.
Географи предмечĕпе тăххăрмĕшсенчен Александр Иванов /Елчĕк/, Николай Александров /Кушкă/, Кирилл Чернов /Çирĕклĕ Шăхаль/, Владимир Бобин /Аслă Елчĕк/, вунпĕрмĕшсенчен Юлия Доброхотова /Елчĕк/ чи пултаруллисем. Вĕсем те регионти олимпиадăна хутшăнма тивĕçлĕ балл пухнă.
Вуннăмĕш класра вĕренекен Валерия Николаева /Елчĕк/ искусствăпа малалла тупăшни савăнтарать. Маларах асăннă вĕренекенсене предметсен олимпиадин регион шайĕнчи тапхăрне хутшăнма республикăри «Индиго» шкулне куçăмлă-куçăмсăр мелпе малалла хатĕрленме йыхравлаççĕ.
М.ЧЕРНОВА.