10 декабря 2016 г.
Производство предприятийĕсемпе суту-илÿ, обществăлла апатлану тата йăла ыйтăвĕсене тивĕçтерекен предприятисем хушшинче кашни çулхи пекех «Елчĕк районĕнчи Çĕнĕ çул çутисем» конкурс ирттересси пирки район администрацийĕ пĕлтернĕ ĕнтĕ.
Район центрĕ декабрь уйăхĕн пуçламăшĕнченех Çĕнĕ çул тата Раштав уявĕсем çывхарнине аса илтерекен çутăсемпе çуталма тытăнчĕ. Ял тăрăхĕсен территорийĕсем, пуçаруллă та теветкеллĕ уйрăм çынсен кил-çурчĕсен таврашĕсем те кунран-кун хитреленсе пыраççĕ. Юмах тĕнчине аса илтерекен кÿлепесемпе паллашма та кăсăклă.
Конкурса хутшăнма кая юлман-ха, ăна декабрĕн 20-мĕшĕ хыççăн пĕтĕмлетеççĕ. Малти вырăнсене йышăнакансене район администрацийĕн дипломĕпе чыслама, укçан преми парса хавхалантарма палăртнă. Тĕплĕнрех район администрацийĕн экономика, пурлăх тата çĕр хутшăнăвĕсен пайĕн специалисчĕсенчен ыйтса пĕлмелле.