07 декабря 2016 г.
Николай МИЛЛИН, район администрацийĕн пуçлăхĕ:
- Раççей Президенчĕ Владимир Путин Федераци Пухăвне янă Çырăвĕнче çĕршывăн шалти тата тулашри политикин ыйтăвĕсене тишкерни, социаллă пурнăçпа экономика лару-тăрăвне тĕплĕн хаклани, умри тĕллевсене уççăн палăртни уйрăмах кăмăла çĕклерĕ. Çитĕнекен ăрăва вĕрентсе воспитани парас, сывлăха сыхлас ĕçсене пысăк тимлĕх уйăрни питĕ вырăнлă. Владимир Владимирович Çырура ялхуçалăх отраслĕ пирки хăйĕн шухăшне пĕлтерни савăнтарчĕ. «Ялхуçалăхĕ пирки темле «хура шăтăк» вырăнне хурса хаклатчĕç: хуть те мĕн чухлĕ укçа пар – пурпĕр кăтарту пулмĕ. Анчах пĕтĕмпех урăхларах йĕркелеме пулать иккен. Тивĕçлĕ йышăнусем турăмăр, ялхуçалăхне пулăшмалли система туса хутăмăр, çавна май паян АПК - çĕршыва тăрантаракан, тĕнче рынокне тухакан ăнăçлă отрасль», - тесе палăртрĕ вăл. Ялхуçалăх кооперативĕсене, фермерсене пулăшассине вăйлатасси çине пысăк тимлĕх уйăрни пирĕн фермерсене рынока тухма çĕнĕ майсем туса парĕ. Ялхуçалăх таварĕсем тата сĕт туса илекенсене субсиди пама тытăнассине те ырлатăп. Аграрисене пулăшни ялсене малалла аталанма май паратех.
Галина УФУКОВА, районти тĕп больницăн тĕп врач çумĕ:
- Эпир, районти медицина ĕçченĕсем, Раççей Президенчĕн Çырăвĕпе тĕплĕн паллашрăмăр. Пире, район халăхĕн сывлăхĕшĕн тăрăшакансене, уйрăмах сывлăха сыхлас енĕпе каланисем чуна çывăх пулчĕç. Çĕршывра демографи лару-тăрăвĕ лайăхланни савăнтарать. Çынсен пурăнас кун-çулĕ вăрăмланни чĕрене ăшăтать. Чăнах та, пирĕн районта та 100 çултан иртнĕ ватăсем пурăнаççĕ. 90 çултан иртнисем те йышлансах пыраççĕ. Çакă юлашки çулсенче медицина пулăшăвĕ парасси лайăхланнипе те çыхăннă. Вăл малашне те приоритетлă задачăсенчен пĕри пулса тăрать. Сывлăха сыхлас ĕçре çивĕч ыйтусем те сахал мар. Вĕсене май килнĕ таран пĕтерсе пырсан халăх пурнăçĕ тата лайăхланĕ.