07 декабря 2016 г.
Лидия Филиппова журналист-публицист пирĕн ентеш - Чăваш Тăрăм ялĕнче çуралса ÿснĕ, Мускаври гуманитарипе экономика институчĕн Шупашкарти филиалĕн тата И.Н.Ульянов ячĕллĕ Чăваш патшалăх университечĕн профессорĕн, ракета çарĕсен подполковникĕн Иван Даниловăн кун-çулĕ çинчен документсемпе тата илемлĕх мелĕсемпе усă курса «Записки академика. Данилов Иван Петрович» ятлă кĕнеке пичетлесе кăларнă.
Чăваш Республикинчи официаллă çынсем - депутатсем, наука, культура тата искусство деятелĕсем, аслă вĕренÿ заведенийĕсен ертÿçисем, журналистсем Наци библиотекинче кĕнекери геройпа - Иван Даниловпа тата авторпа тĕлпулу йĕркеленĕ.
...Елчĕксене те, паллах, йыхравсăр хăварман. Сумлă ентешĕмĕре саламлама район администрацийĕн пуçлăхĕн пĕрремĕш çумĕ - вĕренÿпе çамрăксен политикин пайĕн начальникĕ Леонард Левый хутшăннă. Савăнăçлă лару-тăрура сăмах калама май пулнипе усă курса Леонард Васильевич кĕнеке авторне - Лидия Филипповăна Иван Данилов академикăн пурнăçĕпе кун-çулĕ çинчен ĕненмелле, ĕмĕр манăçмалла мар çутатса панăшăн чĕререн тав тунă. Наука ĕçĕнче çак вăхăтченех ырми-канми вăй хуракан, çирĕп шухăш кăмăллă Иван Петровича малашне те ăнăçусем, чи кирли - çирĕп сывлăх суннă, Елчĕксем унпа тивĕçлипе мухтаннине, мăнаçланнине палăртнă...
С.АНАТОЛЬЕВА.