03 декабря 2016 г.
Чăваш Ен Пуçлăхĕ Михаил Игнатьев Чăваш Республикинчи наркотиксемпе кĕрешекен комиссин черетлĕ ларăвне ирттернĕ. Канашлура çулталăк кăтартăвĕсене пĕтĕмлетнĕ, çитес тапхăр тĕллевĕсене палăртнă.
Михаил Игнатьев палăртнă тăрăх - республикăра наркоманипе чирлекенсен шучĕ юлашки вăхăтра палăрмаллах чакнă. Чăваш Ен кăтартăвĕсем Атăлçи округĕнче тата Раççейре лайăххисен шутĕнче. Яваплă ведомствăсем тухăçлă ĕçлени курăнать. Вĕсем ирттерекен профилактика мероприятийĕсем çынсене спортпа тата физкультурăпа туслашма, сывă пурнăç йĕркипе пурăнма хавхалантараççĕ. Апла пулин те наркомани ыйтăвĕн çивĕчлĕхĕ чакмасть-ха. Çавна май Михаил Васильевич наркоманипе кĕрешес ĕç-хĕлĕн çирĕп йĕркине туса хумаллине палăртнă.
Ларура çамрăксемпе ачасен хушшинче наркотиксемпе психотроплă хутăшсене усă курассине чарассине профилактикăлас тĕлĕшпе пурнăçланă ĕç-хĕл çинчен вĕрентÿ министрĕ Юрий Исаев, сывлăх сыхлав министрĕ Алла Самойлова каласа кăтартнă.
Чăваш Енĕн Сывлăх сыхлавĕн министерствин штатра тăман психиатр наркологĕ Ирина Булыгина палăртнă тăрăх, 178 пациента ĕçе вырнаçма пулăшнă.
Чăваш Республикин «Сывă наци» общество организацийĕн ертÿçи Кирилл Лукин ятарлă проектсене пула 8 ача наркотиксенчен сипленме, тулли пурнăçпа пурăнма пуçланине пĕлтернĕ.