30 ноября 2016 г.
Ноябрĕн 24-мĕшĕнче Чăваш патшалăх оперăпа балет театрĕнче ентешĕмĕр - СССР халăх артисчĕ М.Д.Михайлов ячĕллĕ Пĕтĕм тĕнчери опера фестивалĕ пуçланнă. Вăл декабрĕн 4-мĕшĕччен тăсăлать.
Опера фестивалĕ Шупашкар çыннисемпе хăнисене малтанхи кунсенчен тытăнсах савăнăçлă кăмăл парнелет. Савăнăçлă саманта уçма хутшăннă Чăваш Республикин Пуçлăхĕ Михаил Игнатьев музыка уявне йĕркелесе ирттерекенсен ячĕпе ăшă сăмахсем каланă, Максим Михайловăн пултарулăхне хисепленĕшĕн, унăн ятне асра тытнăшăн тав тунă: «Ентешĕмĕр тăван Чăваш Ене мухтава кăларчĕ. Пирĕн çитĕнекен ăрăва унăн тĕслĕхĕпе, кăмăл-сипет пахалăхĕсене тĕпе хурса, искусствăпа çывăхлатса ÿстермелле», - тенĕ.
Михаил Игнатьев Чăваш патшалăх оперăпа балет театрне музыка инструменчĕсем туянма 395500 тенкĕлĕх сертификат парнеленĕ.
Кăçалхипе 26-мĕш хут иртекен опера фестивальне Дж.Вердин «Отелло» оперипе уçнă. Тĕп ушкăнсене пĕтĕм тĕнчери конкурссен лауреачĕсем - Август Амонов /Мариин театрĕ/, Елена Дементьева /Екатеринбургри патшалăх академи оперăпа балет театрĕ/, Александр Краснов /Мариин театрĕ/ хутшăннă.
Ноябрĕн 26-мĕшĕнче сцена çинче «Кармен» /Жорж Биз/ хуçаланнă. Вырсарникун Э.Сапаев ячĕллĕ Мари патшалăх оперăпа балет театрĕ Сергей Прокофьевăн «Любовь к трем апельсинам» оперипе, ĕнер - ноябрĕн 29-мĕшĕнче Чулхулари А.С.Пушкин ячĕллĕ академи оперăпа балет театрĕ /йышра 170 çын/ Эдуард Фертельмейстерăн «Коко Шанель: страницы жизни» опера-мюзиклĕпе тĕлĕнтернĕ.