26 ноября 2016 г.
Çапла пулмасăр, паян ял хĕрарăмĕн ĕç-хĕлне ĕлĕкхипе танлаштараймăн. Ир-ирех тăрса кăмака хутас çук, шыв ăшăтса кунĕпе япала çумалла мар... Пĕр сăмахпа, хăрăмран, кĕл тусанĕнчен пĕтĕмпех тасалтăмăр. Кил-çуртсенче хăтлăх хуçаланать. Хулари пек условисенче кун кунлатпăр. Унччен тул çутăличченех ура çинче тăнă хĕрарăмăн ыйхи те канлĕ.
Самана таппи малалла пĕр шиксĕр вирхĕннĕрен паянхи хĕрарăмăн пушă вăхăт та çителĕклĕ. Апла пулсан, тавра курăма ÿстерме, юратнă ĕçпе киленме пулать. Кам мĕнпе интересленет - çавна валли тĕрлĕ кружок ĕçлет библиотекăра. Çирĕм çул ытла хĕрарăмсен канашне ертсе пынăран мероприятисене ытларах библиотекăра йĕркелетпĕр. Çулталăк пуçламăшĕнче активистсемпе хамăр умри тĕллевсене палăртатпăр. «Иртнине манмастпăр, хальхипе пурăнатпăр, малашлăха пăхатпăр» ятпа ялти сумлă хĕрарăмсемпе тĕлпулу каçĕсем ирттеретпĕр. Ялти ветерансен канашĕн ертÿçи Дария Смирнова, мĕн тивĕçлĕ канăва тухиччен педагогра ĕçленĕскер, ырă сĕнÿ-канашсем парать. Кĕнеке нумай вулать, ачисемпе мăнукĕсем те библиотекăран тухма пĕлмеççĕ.
Ялта 367 хĕрарăм шутланать. Вĕсенчен пĕри 10 ача çуратса ÿстернĕ. Сумлă амăшĕсене юбилей ячĕпе саламлассине çирĕп йăлана кĕртнĕ. Çавăн пекех кăçал Ĕç çыннин çулталăкĕ пулнă май ĕçре паттăр хĕрарăмсене савăнăçлă лару-тăрура чыслама тăрăшрăмăр. Лидия Ефимова, Мария Манаскина, Анастасия Николаева ячĕсемпе портрет-каçсем ирттертĕмĕр.
Амăшĕсем сывă пурнăç йĕркине тытса пыччăр тесе тăрăшса Татьяна Сусликова фельдшер тăтăшах хĕрарăмсен умĕнче тĕрлĕ темăсемпе калаçусем йĕркелет. Хăй те пилĕк ача амăшĕ.
Аслă ăрури хĕрарăмсем вара çамрăксенчен те харсăртарах. Вĕсем «Хавхалану» клуб йĕркеленĕ. Юрă-ташă ăстисен йышĕнче - 76 çулхи Елизавета Мясниковăпа Дария Смирнова, Елена Синицына, Любовь Кудряшова, Лидия Светопольская, Мария Смирнова, Валентина Николаева, Любовь Шайгина, Валентина Порфирьева, Валентина Иванова тата ыттисем те. Концертсенче чăваш çи-пуçĕсене тăхăнаççĕ те - пăхса ытармалла мар вĕт. Чăваш йăли-йĕркине хăйсен ачисемпе мăнукĕсене вĕрентсе хăварассишĕн тимлеççĕ вĕсем. Республикăри хĕрарăмсен союзĕ пуçарнă «Наци тата культура йăли-йĕркине амăшĕнчен – хĕрне, ашшĕнчен ывăлне парса хăварасси» проекта эпир те хутшăнасшăн.
Хĕрарăмсен канашĕ вун-вун çул хушшинче районта тĕрлĕ ырă ĕçсемпе палăрать. Кунта чи малтанхи ертÿçĕсен - Елена Горшкован, Александра Курчинан тÿпи пысăк. Вĕсен ырă ĕçне эпир малалла тăсатпăр. Районти хĕрарăмсен культурăпа спорт фестивалĕнче тăхăр çул пĕрремĕш, ыттисенче призерсем пулса тăтăмăр.
Ыран - Амăшĕсен уявĕ. Çавна май мăшăрĕнчен тăлăха юлса ачисене пĕччен ура çине тăратнă сумлă хĕрарăмсен ячĕпе мероприяти йĕркелетпĕр. Пирĕн йышра ăшă сăмахсене тивĕçлĕ тăлăх арăмсем сахал мар.
Эпир пĕрле пухăнса калаçнипе кăна çырлахмастпăр. Çитес çул районти хĕрарăмсен канашне йĕркелени 90 çул çитет. Çавна май умра çĕнĕ ĕмĕт-тĕллевсем палăртатпăр.
Р.ГОРШКОВА,
Курнавăшри хĕрарăмсен канашĕн ертÿçи.
Сăнÿкерчĕкре: «Хавхалану» клуба çÿрекенсен пĕр ушкăнĕ.