23 ноября 2016 г.
Тунтикун район администрацийĕн пуçлăхĕ Николай Миллин предприятисемпе организацисен, учрежденисен, район администрацийĕн пайĕсен ертÿçисемпе, ял тăрăхĕсен пуçлăхĕсемпе анлă канашлу ирттернĕ.
Канашлура çĕкленĕ ыйтусенчен пĕри - йăлари хытă каяшсене турттарса тухасси. Район администрацийĕн пуçлăхĕн çумĕ - финанс пайĕн ертÿçи Галина Анисимова палăртнă тăрăх, кăçал йăлари хытă каяшсене пухма, илсе тухса пушатма районĕпе 1017,2 пин тенкĕ тăкаклама палăртнă. Ноябрĕн 15-мĕшĕ тĕлне касса тăкакĕсем 693 пин тенкĕпе танлашаççĕ. Анчах кăтартусене илес пулсан, тĕрлĕ ял тăрăхĕнче вĕсем тĕрлĕрен. Акă, Аслă Елчĕк ял тăрăхĕнче йăлари хытă каяшсене илсе тухма каякан тăкаксем районти вăтам кăтартуран чылай пысăк. Çавăнпа Галина Анисимова бюджетран уйăракан укçа-тенкĕпе перекетлĕ, тĕллевлĕ усă курма чĕнсе каларĕ. Район администрацийĕн пуçлăхĕ Николай Миллин хăш та пĕр ял тăрăхĕсенче çак ĕçе тивĕçлипе йĕркеленине палăртрĕ. Уйрăмах ку енĕпе Елчĕк ял тăрăхĕн администрацийĕ, Патреккелсем пуçаруллă. Вĕсен ырă тĕслĕхне ытти ял тăрăхĕсем алла илни вырăнлă.
Юлашки вăхăтра интернетпа, карас телефонĕсемпе, банксен карттисемпе усă курса шульăксем çынсене улталама хăтланни ÿссе пыни палăрать. Çавăнпа ултавран сыхланас тĕллевпе Раççей Шалти ĕçсен министерствин муниципалитетсем хушшинчи «Комсомольский» уйрăмĕн полицин Елчĕк районĕнчи ертÿçин çумĕн тивĕçĕсене вăхăтлăха пурнăçлакан Алексей Алексеев профилактика ĕçĕсене туллин пурнăçлама кирлине палăртрĕ.
Раççей Федерацийĕн суд приставĕсен службин Чăваш Республикинчи управленийĕн Елчĕк районĕнчи пайĕн ертÿçи Валерий Казаков право акчĕсене электрон мелĕпе тупмаллипе паллаштарчĕ.
Канашлура районшăн пĕлтерĕшлĕ ытти ыйтусене те тишкернĕ.